പ്രസവം നിർത്തുന്ന ശസ്ത്രക്രിയ ചെയ്തതാണ്. എങ്കിലും ഗർഭിണി ആകുമോ എന്നു ഭയക്കുന്നവരുമുണ്ട്. എന്നാൽ ഇത് വളരെ അപൂർവമായി മാത്രമേ സംഭവിക്കാറുള്ളുവെന്നാണ് വിദഗ്ധർ പറയുന്നത്. അതായത് 1000 പേരെ എടുത്താൽ ഒരാളിൽ ഈ ഓപ്പറേഷൻ ചിലപ്പോൾ പരാജയപ്പെട്ടെന്നു വരാം. അതോർത്ത് ടെൻഷനടിക്കേണ്ടെന്നു സാരം.
രണ്ട് അണ്ഡവാഹിനിക്കുഴലുകളുടെയും ഒരു ചെറിയ ഭാഗം എടുത്തുകളഞ്ഞിട്ടാണ് ഗർഭനിയന്ത്രണ ശസ്ത്രക്രിയ ചെയ്യുന്നത്. ശസ്ത്രക്രിയ നടത്തിയാലും വീണ്ടും ഗർഭം ധരിക്കണമെന്ന ആഗ്രഹവുമായി എത്തുന്നവരുമുണ്ട്. അതിനാൽത്തന്നെ ഇതു മുന്നിൽക്കണ്ട് റീകനാലൈസേഷൻ ഓപ്പറേഷൻ നടത്താൻ പറ്റുന്ന വിധത്തിൽ കുറച്ചുഭാഗം മാത്രമാണ് ഇപ്പോൾ പലരും എടുത്തുമാറ്റുന്നത്.
വളരെ ചുരുക്കം സ്ത്രീകളിൽ ബാക്കിവച്ചിരിക്കുന്ന ട്യൂബിന്റെ രണ്ടറ്റവും കൂടി യോജിച്ച് ചിലപ്പോൾ ഗർഭധാരണം നടന്നേക്കാം. ആർത്തവം തെറ്റി എന്നറിയുമ്പോൾ മൂത്രപരിശോധനയിലൂടെ ഗർഭിണിയാണോ എന്നു സ്ഥിരീകരിക്കാവുന്നതാണ്. വേണ്ടെങ്കിൽ ട്യൂബിന്റെ ഭൂരിഭാഗവും എടുത്തു കളഞ്ഞാൽ പിന്നെ ഗർഭംധരിക്കാൻ സാധിക്കില്ല.
