ആർത്തവം (Menstruation)

Q 32 വയസ്സ്. മൂന്നു കുട്ടികളുടെ അമ്മയാണ്. എല്ലാ മാസവും ചില ദിവസങ്ങളിൽ സ്രവം കൂടുതലായി പുറത്തു പോകുന്നു. ദുർഗന്ധമുണ്ട്. ഈ സമയത്ത് വയറുവേദനയുമുണ്ട്. ഭർത്താവുമായുള്ള ലൈംഗിക ജീവിതം സജീവമാണ്. ആർത്തവചക്രവും ഏതാണ്ട് കൃത്യമാണ്. ഇതിന് ഡോക്ടറെ കണ്ട് ചികിത്സ തേടണ്ടതുണ്ടോ ?

ആനി, എറണാകുളം

Aവെള്ളപോക്ക് എന്ന സ്രവത്തിന്റെ ഡിസ്ചാർജ് സ്ത്രീകളിൽ സാധാരണമാണ്. ആർത്തവചക്രത്തിനനുസരിച്ച് സ്രവത്തിന്റെ പ്രത്യകതകളിലും മാറ്റം വരാം. അണ്ഡവിസർജനം നടക്കുന്ന സമയത്ത് അതു വെള്ളംപോലെ തെളിഞ്ഞതായിരിക്കും. ആർത്തവത്തിന് മുൻപും ആർത്തവശേഷവും വെള്ള നിറമാകാം. ഏതെങ്കിലും തരത്തിലുള്ള അണുബാധ ഉണ്ടായാൽ സ്രവത്തിന്റെ അളവു കൂടാനും സാധ്യതയുണ്ട്. കാൻഡിഡ് ഫംഗസ് ബാധയാണ് സാധാരണമായി കാണാറ്. ഈ സമയത്ത് സ്രവത്തിനു കട്ടികൂടുകയും ചെയ്യാം. യീസ്റ്റ്, ഫംഗസ് ബാധകളിൽ ചൊറിച്ചിലും പുകച്ചിലും ഉണ്ടാകാനുള്ള സാധ്യതയുമുണ്ട്.

അണുബാധ യോനിയുടെ അകത്താണെങ്കിലും ചൊറിച്ചിൽ പലരിലും യോനിയുെട പുറം ചർമത്തിലായിരിക്കും അനുഭവപ്പെടുക. അതിനാൽ മിക്കവരും ആന്റിഫംഗൽ ക്രീമുകളും മറ്റും യോനിക്കു പുറത്തു പുരട്ടും. പക്ഷേ അതു കാര്യമായ ഫലം ചെയ്യാറില്ല.

ബാക്ടീരിയൽ വജൈനോസിസ് എന്ന അണുബാധയാണെങ്കിൽ ചിലപ്പോൾ സ്രവത്തിന്റെ നിറം ഇളം പച്ചയായി മാറി ദുർഗന്ധവും കാണാറുണ്ട്. എന്നാല്‍ എല്ലാവരിലും ഈ ലക്ഷണങ്ങൾ ഉണ്ടാവില്ല. ചിലരിൽ കാര്യമായ ഒരു സൂചനയും കാണില്ല.. സജീവമായ ലൈംഗിക ജീവിതമുള്ളവരിൽ ഇതു വരാൻ സാധ്യത കൂടും. ട്രൈക്കോമൊണിയാസിസ് അണുബാധയിലും പച്ചനിറത്തിൽ ഡിസ്ചാർജും ചൊറിച്ചിലും ഉണ്ടാകും .

അണുബാധകൾ തീവ്രമാകുമ്പോഴാണ് വേദന മുതൽ പനിവരെയുള്ള ലക്ഷണങ്ങൾ കാണുക. ബാക്ടീരിയൽ അണുബാധ യോനിയെ മാത്രമല്ല തീവ്രമായാൽ ഗർഭാശയത്തെയും അണ്ഡാശയത്തെയുമൊക്കെ ബാധിക്കാം. ഈ സമയത്ത് ലക്ഷണങ്ങൾ കൂടുതലായി കാണും. ഈ അവസ്ഥയാണ് പെൽവിക് ഇൻഫ്ളമേറ്ററി ഡിസീസ്. അപ്പോൾ അടിവയറിൽ വേദനയും ചിലപ്പോൾ പനി, മറ്റ് അസ്വസ്ഥതകളും കാണാം. കത്തിലെ സൂചനകളിൽനിന്ന് ഈ പ്രശ്നത്തിനുള്ള സാധ്യത സംശയിക്കണം.

ഇതു തുടക്കത്തിലേ ചികിത്സിച്ചില്ലെങ്കിൽ വന്ധ്യതക്കുപോലും കാരണമാകാം. ഏറെ ദുർഗന്ധത്തോടെയുള്ള ഡിസ്ചാർജ് ആണെങ്കിൽ പാപ്സ്മിയർ ഉൾപ്പെടെയുള്ള പരിശോധനകൾ വേണ്ടിവരും. അപൂർവം ചിലരിൽ യോനിക്കുള്ളിൽ ടാമ്പൺ പോലുള്ള വസ്തുക്കൾ കുടുങ്ങുന്നതും അമിതസ്രവത്തിനു കാരണമാകാം. ഏതായാലും ഉടനേ തന്നെ ഒരു ഗൈനക്കോളജിസ്റ്റിനെ കണ്ട് വിശദമായ പരിശോധന നടത്തുക..

േഡാ. സുഭദ്രാ നായർ

കൺസൽറ്റന്റ് ഗൈനക്കോളജിസ്റ്റ്,

േകാസ്മോപൊളിറ്റൻ േഹാസ്പിറ്റൽ,
തിരുവനന്തപുരം. ഡയറക്ടർ ആൻഡ് പ്രഫസർ
(റിട്ട.), ഡിപാർട്മെന്റ് ഒാഫ് ൈഗനക്കോളജി,

െമഡിക്കൽ േകാളജ്, തിരുവനന്തപുരം

ആർത്തവം ഒരു അസൗകര്യമായി തോന്നാമെങ്കിലും ആർത്തവം നിലയ്ക്കുമ്പോഴാണ് അതു ശരീരത്തിന് എത്രയേറെ ഗുണകരമായിരുന്നെന്ന് നാം തിരിച്ചറിയുക. ആർത്തവം കൃത്യമായിരുന്നാൽ അതിനർഥം നമ്മുടെ ശരീരത്തിലെ ഹോർമോൺ സന്തുലനം കൃത്യമാണെന്നാണ്. നിങ്ങളുടെ അണ്ഡാശയവും തലച്ചോറും ചേർന്ന് യോജിച്ച് പ്രവർത്തിക്കുമ്പോഴാണ് ആർത്തവം കൃത്യമായി സംഭവിക്കുന്നത്. തലച്ചോറിലെ ഹൈപ്പോതലാമസും പിറ്റ്യൂട്ടറി ഗ്രന്ഥിയുമാണ് അണ്ഡാശയവും തലച്ചോറും തമ്മിലുള്ള ഈ ആശയവിനിമയത്തെ നിയന്ത്രിക്കുന്നത്. അഡ്രിനൽ ഗ്രന്ഥി, കുടൽ, തൈറോയ്ഡ് എന്നിവയെല്ലാം ഈ പ്രക്രിയകളിൽ പങ്കാളികളാകുന്നുണ്ട്. അതുകൊണ്ടുതന്നെ ക്രമമായ ആർത്തവം മേൽപറഞ്ഞവയെല്ലാം കൃത്യമായി പ്രവർത്തിക്കുന്നു എന്നതിന്റെ അടയാളമാണ്. ഹോർമോണുകളുടെ സന്തുലനം കൃത്യമായിരിക്കുമ്പോൾ അസ്ഥികളുടെ ആരോഗ്യവും നന്നായിരിക്കും.

അണ്ഡാശയം ഈസ്ട്രജൻ ഹോർമോൺ ഉൽപാദനം നിർത്തുന്നതോടെയാണ് ആർത്തവ വിരാമം സംഭവിക്കുന്നത്. സാധാരണ ഗതിയിൽ 50 –55 വയസ്സാകുമ്പോഴാണ് ആർത്തവ വിരാമം വരുന്നത്. എന്നാൽ ചിലരിൽ 40കളിലേ ആർത്തവം നിലയ്ക്കാം. നാൽപതു വയസ്സിനു മുൻപു സംഭവിക്കുന്ന ആർത്തവ വിരാമത്തെ പ്രിമച്വർ അഥവാ അകാല ആർത്തവവിരാമം എന്നു പറയുന്നു. പ്രിമച്വർ ഒവേറിയൻ ഫെയിലിയർ എന്നും ഇതിനെ വിശേഷിപ്പിച്ചു കാണാറുണ്ട്. 45 വയസ്സിനു ശേഷമാണ് ആർത്തവ വിരാമം സംഭവിക്കുന്നത് എങ്കിൽ അതിനെ ഏർലി മെനപോസ് എന്നു പറയുന്നു.

ചിലരിൽ ഇതു സ്വാഭാവികമായി സംഭവിക്കുന്നതാണ്. എന്നാൽ മറ്റു ചിലരിൽ പുകവലി, ചിലതരം മരുന്നുകൾ, കീമോതെറപി പോലുള്ള ചില ചികിത്സകൾ, ഗർഭപാത്രവും അണ്ഡാശയവും നീക്കുന്നതു പോലുള്ള ശസ്ത്രക്രിയകൾ എന്നിവ മൂലം ആർത്തവവിരാമം നേരത്തെയെത്താം. തൈറോയ്ഡ്, റുമറ്റോയ്ഡ് ആർത്രൈറ്റിസ് പോലുള്ള രോഗങ്ങളിലും ചിലപ്പോൾ ആർത്തവം നേരത്തേ നിലയ്ക്കാം. കുടുംബപരമായി ആർത്തവവിരാമം നേരത്തെ സംഭവിക്കുന്ന അവസ്ഥ ഉണ്ടെങ്കിലും ഇങ്ങനെ വരാം. ചില വൈറൽ അണുബാധകൾ, ഈറ്റിങ് ഡിസോഡർ, തൈറോയ്ഡ് പ്രവർത്തന തകരാറുകൾ എന്നിവയും ആർത്തവവിരാമം നേരത്തേയാകാൻ ഇടയാക്കാം.

ലക്ഷണങ്ങളറിയാം

അണ്ഡാശയത്തിന്റെ ഈസ്ട്രജൻ ഉൽപാദനം കുറയുമ്പോൾ താഴെ പറയുന്ന സൂചനകൾ കാണാം.

∙ ആർത്തവം ക്രമം തെറ്റുകയോ ഇടയ്ക്ക് വരാതിരിക്കുകയോ ചെയ്യുക

∙ പതിവിലും രക്തസ്രാവം കുറയുകയോ കൂടുകയോ ചെയ്യുക

∙ ശരീരം ഉഷ്ണിക്കും പോലെ തോന്നുക, ഹോട്ട് ഫ്ലാഷസ് എന്നാണ് ഇതിനു പറയുക

ഈ ലക്ഷണങ്ങളോടൊപ്പം ചില സ്ത്രീകളിൽ യോനീഭാഗത്ത് വരൾച്ച അനുഭവപ്പെടാം. മൂത്രം നിയന്ത്രിക്കാനുള്ള ശേഷി കുറയാം, മൂത്രാശയ അസ്വാസ്ഥ്യങ്ങൾ ഇടയ്ക്കിടെ വരാം.

∙ മൂഡ് വ്യതിയാനങ്ങൾ, അസവാസ്ഥ്യം, വിഷാദം പോലുള്ള വൈകാരികപ്രശ്നങ്ങൾ കണ്ടുതുടങ്ങാം

∙ ഉറക്കക്കുറവ്

∙ ലൈംഗികതാൽപര്യം കുറയാം.

സാധാരണ ആർത്തവ വിരാമ സമയത്ത് അനുഭവപ്പെടുന്നതുപോലുള്ള അസ്വാസ്ഥ്യങ്ങൾ തന്നെയാണ് ആർത്തവവിരാമം നേരത്തെ എത്തിയാലും സംഭവിക്കുക. ഈസ്ട്രജൻ നിരക്ക് കുറയുന്നതു മൂലം ചില രോഗാവസ്ഥകൾ്കകുള്ള സാധ്യത വർധിക്കാം. അസ്ഥിസാന്ദ്രത കുറയുന്ന ഒാസ്റ്റിയോപൊറോസിസ്, കുടൽ, അണ്ഡാശയ അർബുദങ്ങൾ, മോണരോഗങ്ങൾ, തിമിരം, ദന്തപ്രശ്നങ്ങൾ എന്നിവ ഉദാഹരണം.

മേൽപറഞ്ഞതുപോലുള്ള അസ്വസ്ഥതകൾ കണ്ടാൽ ഒരു സ്ത്രീരോഗ വിദഗ്ധയെ കണ്ട് പരിശോധിക്കുക.ഈസ്ട്രജൻ, ഫോളിക്കിൾ സ്റ്റിമുലേറ്റിങ് ഹോർമോൺ പോലുള്ളവയുടെ രക്തത്തിലെ അളവു പരിശോധിച്ചാൽ ആർത്തവവിരാമം ആണോയെന്നുറപ്പിക്കാം. ഹോർമോൺ റീപ്ലേസ്മെന്റ് തെറപി ഉൾപ്പെടെയുള്ള ചികിത്സാസാധ്യതകളെക്കുറിച്ച് ഡോക്ടറുടെ അഭിപ്രായം തേടുക.

ജീവിതത്തിൽ വളരെ പ്രാധാന്യം കൊടുക്കേണ്ട ഘടകങ്ങളാണ് ഭക്ഷണവും പോഷകങ്ങളും. ആരോഗ്യപൂർണമായ ഒരു ജീവിതശൈലി തുടർന്നു കൊണ്ടുപോകാൻ ഭക്ഷണത്തിലൂടെ ലഭിക്കുന്ന മികച്ച പോഷകങ്ങൾ അത്യാവശ്യമാണ്. പോഷകക്കുറവ് ഏറെ ബാധിക്കുന്നത് സ്ത്രീകളെയാണ്. ജീവിതം മുഴുവൻ പലതരത്തിലുള്ള ശാരീരിക മാറ്റങ്ങൾക്ക് വിധേയരാകുന്നവരാണ് സ്ത്രീകൾ. അതുകൊണ്ട് അവർക്ക് കൂടുതൽ പോഷകങ്ങളുടെ ആവശ്യമുണ്ട്. പോഷകങ്ങൾ അവരെ കൂടുതൽ ശക്തരാക്കുകയും ജീവിതത്തിൽ നേരിടേണ്ടി വരുന്ന പ്രതിസന്ധികളെ കൂടുതൽ കരുത്തോടെ നേരിടാൻ സഹായിക്കുകയും ചെയ്യും. രോഗങ്ങളെ മെച്ചപ്പെട്ട രീതിയിൽ നേരിടാനും ഇവ സഹായകമാകും.

സ്ത്രീകൾ പ്രധാനമായും 3 ജീവിത ഘട്ടങ്ങളിലൂടെയാണ് കടന്നുപോകുന്നത് :

• കൗമാരവും ആർത്തവാരംഭവും
• ഗർഭകാലവും മുലയൂട്ടലും
•  ആർത്തവവിരാമവും വാർദ്ധക്യവും

കൗമാരവും ആർത്തവാരംഭവും

പ്രധാനപ്പെട്ട ഹോർമോൺ മാറ്റങ്ങൾ സംഭവിക്കുന്നത് കൗമാരം തുടങ്ങുമ്പോഴാണ്. ആർത്തവത്തിന് ഒരുങ്ങുന്ന പെൺശരീരം ഹോർമോൺ വ്യതിയാനങ്ങൾ കാണിച്ചുതുടങ്ങും. ചർമപ്രശ്നങ്ങൾ, മുഖക്കുരു, മുടി കൊഴിച്ചിൽ, തൂക്കം കൂടുക, ഉത്കണ്ഠ, വിഷാദം, പി. സി. ഒ. എസ്, തൈറോയ്ഡ് പോലുള്ള അസുഖങ്ങൾ ഈ പ്രായത്തിൽ പ്രകടമായി തുടങ്ങും. സ്ത്രീ ശരീരത്തിന്റെ ആരോഗ്യം വ്യക്തമാകുന്ന ഈ ഘട്ടത്തിൽ പോഷകങ്ങൾ വളരെ പ്രാധാന്യം അർഹിക്കുന്നു.

പ്രധാനമായും കാണപ്പെടുന്ന പോഷകക്കുറവ്

• ഇരുമ്പ് സത്ത്
• വിറ്റാമിൻ ഡി 3
• കാൽസ്യം

ഇത്തരം പോഷകക്കുറവ് പരിഹരിക്കാൻ ഭക്ഷണത്തിലും ജീവിതശൈലിയിലും ശ്രദ്ധ കൊടുക്കണം. ഇരുമ്പ് സത്ത് ധാരാളം അടങ്ങിയ ചിക്കൻ, പയർ വർഗ്ഗങ്ങൾ, മീൻ തുടങ്ങിയവയും വിറ്റാമിൻ ഡി 3 അടങ്ങിയ മീൻ, മീനെണ്ണ തുടങ്ങിയവയും കാൽസ്യം സമ്പുഷ്ടമായ റാഗി, പാൽ, പാലുല്പന്നങ്ങൾ, ഇലക്കറികൾ എന്നിവയും ഭക്ഷണത്തിൽ ഉൾപ്പെടുത്തണം.

ഗർഭകാലവും മുലയൂട്ടലും

ഗർഭം ധരിക്കലും കുഞ്ഞിനെ മുലയൂട്ടുന്നതും സ്ത്രീയുടെ ജീവിതത്തിലെ പ്രധാനപ്പെട്ട ഘട്ടമാണ്. രണ്ട് പേരുടെ പോഷകാവശ്യങ്ങൾ കണക്കിലെടുത്ത് സാധാരണ കഴിക്കുന്നതിനേക്കാൾ രണ്ടിരട്ടിയോ മൂന്നിരട്ടിയോ പോഷകങ്ങൾ കഴിക്കണം. ഗർഭിണികളിലെ പോഷകക്കുറവ് ഗർഭസ്ഥ ശിശുവിന്റെ ആരോഗ്യത്തെയും ബാധിക്കും. പോഷകസമ്പന്നമായ സന്തുലിതഭക്ഷണം കഴിക്കുന്നതിലൂടെയും അയൺ പോലുള്ള വിറ്റാമിൻ സപ്ലിമെൻറ്സ് എടുക്കുന്നതിലൂടെയും ആരോഗ്യകരമായ ഗർഭകാലം ഉറപ്പിക്കാം. ഗർഭകാലത്തുണ്ടാകുന്ന പ്രമേഹം ഒഴിവാക്കാനും ഇവ സഹായിക്കും.

മുലയൂട്ടൽ ആരംഭിക്കുമ്പോൾ കൂടുതൽ പോഷകങ്ങൾ ആവശ്യമായി വരും. മുലപ്പാൽ വർധിപ്പിക്കാനുള്ള വഴികൾ അറിയാത്ത അമ്മമാർ കുഞ്ഞിന് പാൽ തികയാതെ ഫോർമുല മിൽക്ക് കൊടുത്തു തുടങ്ങും.

ഈ ഘട്ടത്തിൽ കണ്ടുവരുന്ന പ്രധാന പോഷകക്കുറവ് 

• അയോഡിൻ
• വിറ്റാമിൻ എ
• വിറ്റാമിൻ ബി കോംപ്ലക്സ്

അയോഡിൻ സമ്പുഷ്ടമായ ഇലക്കറികൾ, ഉപ്പ്, തുടങ്ങിയവയും വിറ്റാമിൻ എ അടങ്ങിയ ക്യാരറ്റ്, മുള്ളങ്കി എന്നിവയും വിറ്റാമിൻ ബി കോംപ്ലക്സ് അടങ്ങിയ നട്സ്, ധാന്യങ്ങൾ, വിത്തുകൾ തുടങ്ങിയവയും കഴിക്കണം.

ആർത്തവവിരാമവും വാർദ്ധക്യവും 

വാർദ്ധക്യം മൂലം ഉണ്ടാകുന്ന പോഷകനഷ്ടങ്ങൾ, ആർത്തവ വിരാമത്തിന്റെ ഫലമായുള്ള ഹോർമോൺ മാറ്റങ്ങൾ എന്നിവ സ്ത്രീകളെ ഈ പ്രായത്തിൽ വിഷമാവസ്ഥയിലലാക്കും. മുൻകോപവും ശുണ്ഠിയുമെല്ലാം ഈ മാറ്റങ്ങളുടെ ബാക്കിപത്രമാണ്. ഈസ്ട്രോജന്‍ നിലയിൽ ഉണ്ടാകുന്ന കുറവ് മൂലം ശരീരത്തിൽ ചൂടും വിയർപ്പും അനുഭവപ്പെടാം. ആർത്തവവിരാമത്തിന്റെ പ്രധാന ലക്ഷണമാണ് ഇത്. എല്ലിന്റെ ബലം ക്ഷയിക്കുകയും സിനോവിൽ ഫ്ലൂയിഡ് കുറയുകയും ചെയ്യും.തന്മൂലം എല്ലിനും സന്ധികൾക്കും വേദന ഉണ്ടാകും. വാർദ്ധക്യത്തിലെ ശാരീരിക ബലക്കുറവ് നേരിടാനും പോഷകങ്ങൾ ആവശ്യമാണ്.

ഈ പ്രായത്തിലെ പ്രധാന പോഷകക്കുറവ്

• അയൺ
• വിറ്റാമിൻ ഡി 3
• കാൽസ്യം
• പൊട്ടാസ്യം
• വിറ്റാമിൻ എ

ഈ കുറവുകൾ നികത്താൻ ഭക്ഷണത്തിലും ജീവിത ശൈലിയിലും മാറ്റം വേണ്ടി വരും. ഇരുമ്പ് സത്ത് ധാരാളം അടങ്ങിയ ചിക്കൻ, പയർ വർഗ്ഗങ്ങൾ, മീൻ തുടങ്ങിയവയും വിറ്റാമിൻ ഡി 3 അടങ്ങിയ മീൻ, മീനെണ്ണ തുടങ്ങിയവയും കാൽസ്യം സമ്പുഷ്ടമായ റാഗി, പാൽ, പാലുല്പന്നങ്ങൾ, ഇലക്കറികൾ എന്നിവയും പൊട്ടാസ്യം അടങ്ങിയ നട്സ്, വിത്തുകൾ, പച്ചക്കറികൾ എന്നിവയും വിറ്റാമിൻ എ അടങ്ങിയ ക്യാരറ്റ്, മുള്ളങ്കി എന്നിവയും ഭക്ഷണത്തിൽ ഉൾപ്പെടുത്തണം.

ലേഖിക: കേജൽ ശേത്ത്

പുരുഷന് ആവശ്യമുള്ളപ്പോള്‍ മാത്രം സ്വന്തം വികാരങ്ങളെ ജ്വലിപ്പിക്കാനുള്ള അഗ്നി മാത്രമാണു താനെന്നാണോ ഇന്നും സ്ത്രീ സ്വയം കരുതുന്നത്. അതോ ലൈംഗികതയിലെ ഇഷ്ടാനിഷ്ടങ്ങളെ തുറന്നു പറയാന്‍ അവള്‍ ധൈര്യം കാണിക്കുന്നുണ്ടോ? ഇതല്ല താനാഗ്രഹിക്കുന്നതെന്ന് എന്നു സത്യസന്ധയാകാന്‍ അവള്‍ക്കാകുന്നുണ്ടോ?

വൈകുന്നേരം അടുക്കളപ്പണികളെല്ലാം ഒതുക്കി കഴിഞ്ഞ് മേല്‍കഴുകി വന്നാല്‍ പുരുഷന്റെ താല്‍പര്യത്തിനുവേണ്ടിയുള്ള ഒരിത്തിരി സമയം എന്ന പഴഞ്ചന്‍ കണ്‍സെപ്റ്റല്ല സ്ത്രീക്ക് ലൈംഗികതയെക്കുറിച്ചുള്ളത്. വിവാഹജീവിതത്തില്‍ ലൈംഗികത പ്രധാനം തന്നെയാണെന്ന് ഇന്നവള്‍ കരുതുന്നു. രതി നല്‍കുന്ന സന്തോഷവും ആനന്ദവും തന്റെ കൂടി അവകാശമാണെന്നും ഇന്നവള്‍ക്കു തിരിച്ചറിവുണ്ട്.

സ്ത്രീ, ലൈംഗികതയുടെ കാര്യത്തില്‍ കൂടുതല്‍ ബോധവതിയായതോടെ അവളെക്കുറിച്ചുള്ള പല പഴഞ്ചന്‍ സങ്കല്‍പങ്ങളും പൊളിച്ചെഴുതേണ്ടിവന്നു തുടങ്ങി. ഒരൊറ്റ ഇണയോടൊപ്പമുള്ള ലൈംഗികതയില്‍ പുരുഷന് എളുപ്പം ബോറടിക്കുമെന്നത് ഇന്നൊരു പുത്തനറിവല്ല. എന്നാല്‍ ഇതേ ബോറടി സ്ത്രീക്കുമുണ്ടെന്നു വന്നാലോ? ഒരൊറ്റ പുരുഷനോടൊപ്പമുള്ള ജീവിതം തങ്ങള്‍ക്കും ബോറടിയാണെന്ന് ചില സ്ത്രീകളെങ്കിലും തുറന്നു പറയുന്നുണ്ടെന്നാണ് മനശാസ്ത്രവിദഗ്ധരുടെ നിരീക്ഷണം. തങ്ങളുടെ വികാരങ്ങള്‍ക്കും ഇഷ്ടങ്ങള്‍ക്കും യാതൊരു വിലയും നല്‍കാത്ത പങ്കാളികളാണെങ്കില്‍ പ്രത്യേകിച്ചും.

പക്ഷേ, സ്ത്രീയുടെ പുതുതായി കിട്ടിയ ലൈംഗികാവബോധത്തെ പുരുഷനത്ര കണക്കിലെടുക്കുന്നില്ലെന്നാണ് മിക്ക ലൈംഗികാരോഗ്യ വിദഗ്ധരുടേയും അഭിപ്രായം. തനിക്കിപ്പോഴും പൂര്‍ണമായി കീഴടക്കാനാവാത്ത ആ വികാരസാമ്രാജ്യത്തെ അവന്‍ ഒരേസമയം മോഹിക്കുകയും ഭയപ്പെടുകയും ചെയ്യുന്നു. കീഴടക്കുന്നതിലും ആ വിജയത്തില്‍ ആനന്ദിക്കുന്നതിലുമാണ് പുരുഷന് താല്‍പര്യം. പക്ഷേ, നനുത്ത പരിലാളനങ്ങളില്‍ സ്വയം മറന്നു മുഴുകാനും പതിയെ എരിഞ്ഞുതുടങ്ങി ഒടുവില്‍ അഗ്നിയായി മാറാനുമാണ് സ്ത്രീ കൊതിക്കുന്നത്.

എന്താണ് ലൈംഗികതയില്‍ സ്ത്രീ ആഗ്രഹിക്കുന്നത്? സ്ത്രീ സ്‌നേഹത്തിനു വേണ്ടിയാണ് ലൈംഗികതയിലേര്‍പ്പെടുന്നത്. എന്നാല്‍, പുരുഷന്‍ ലൈംഗികതയ്ക്കുവേണ്ടി സ്‌നേഹിക്കുന്നു എന്നു പറയാറുണ്ട്. ഇത് നൂറു ശതമാനം ശരിയാണെന്നാണ് ഗവേഷണങ്ങളുടെയും കണ്ടെത്തല്‍. സ്‌നേഹം, ആത്മബന്ധം തുടങ്ങിയ വികാരങ്ങളുമായി ബന്ധപ്പെട്ടു നില്‍ക്കുന്നു സ്ത്രീ ലൈംഗികത.

വൈകാരികമായ അടുപ്പം തോന്നുന്ന പുരുഷനോടൊപ്പമുള്ള ലൈംഗികതയാണ് സ്ത്രീ ഇഷ്ടപ്പെടുന്നത്. മറ്റൊരു തരത്തില്‍ പറഞ്ഞാല്‍ തീവ്രമായ വൈകാരിക അടുപ്പത്തിന്റെ പ്രകാശനമാകാം സ്ത്രീയെ സംബന്ധിച്ച് ലൈംഗികത. മറിച്ച്, പുരുഷന്റെ ലൈംഗിക ഉണര്‍വും വികാരവുമെല്ലാം തികച്ചും ജൈവപരമാണ്.

വയാഗ്രയുടെ നിര്‍മാതാക്കള്‍ നടത്തിയ ഒരു പഠനഫലം അമ്പരപ്പിക്കുന്നതായിരുന്നു. തലച്ചോറാണത്രെ സ്ത്രീയുടെ ഏറ്റവും ശക്തിമത്തായ ലൈംഗികാവയവം. തലച്ചോറിന്റെ ഉത്തേജനത്തിലൂടെയാണ് അവര്‍ ലൈംഗികസംതൃപ്തി നേടുന്നത്. കൂടുതല്‍ നേരം രതിപൂര്‍വലീലകള്‍ വേണമെന്നു സ്ത്രീകള്‍ ആഗ്രഹിക്കുന്നതിനു കാരണമിതാണ്.

പുരുഷന്റെയും സ്ത്രീയുടെയും ഉണര്‍വും മോഹങ്ങളും ഏറെ വിഭിന്നമാണെന്നും ഗവേഷകര്‍ കണ്ടെത്തി. ചുംബനങ്ങളിലൂടെയും മധുരവാക്കുകളിലൂടെയും തലോടലുകളിലൂടെയും പുരുഷന്റെ സ്‌നേഹം ലഭിച്ചാലേ സ്ത്രീയുടെ ശരീരം രതിയ്ക്കായി ഉണരൂ. സ്ത്രീ നഗ്നത പുരുഷനെ ഉണര്‍ത്തുകയും ലൈംഗികതയിലേയ്ക്കു നയിക്കുകയും ചെയ്‌തേക്കാം.

എന്നാല്‍, സുന്ദരമായ ഒരു പുരുഷ ശരീരം ഉണര്‍ത്തുന്ന ആകര്‍ഷണം കൊണ്ടു മാത്രം സ്ത്രീ, ലൈംഗികതയ്ക്കു തയാറാകില്ല. വൈകാരികവും ബുദ്ധിപരവും തുടങ്ങി ഒട്ടനവധി ഘടകങ്ങളെ ആശ്രയിച്ചിരിക്കുന്നു ലൈംഗികതയിലേക്കുള്ള അവളുടെ ചുവടുവയ്പ്. ചുരുക്കി പറഞ്ഞാല്‍ സ്ത്രീയുടെ ലൈംഗികോര്‍ജം വൈകാരികമായ ഒന്നാണ്. വെറും ശാരീരികമല്ല.

ഈ ഒറ്റക്കാരണം കൊണ്ടുതന്നെ സ്ത്രീകളിലെ ലൈംഗിക ഉത്തേജനക്കുറവ് പുരുഷന്റെ ഉദ്ധാരണശേഷിക്കുറവിനേക്കാള്‍ സങ്കീര്‍ണമാണ്. വയാഗ്ര പോലുള്ള രക്തപ്രവാഹം വര്‍ധിച്ച് ഉത്തേജനം കൂട്ടുന്ന ഔഷധങ്ങള്‍ സ്ത്രീക്ക് ഗുണം ചെയ്യില്ല. സ്‌നേഹപരിലാളനങ്ങളോ ഒരു അഭിനന്ദനവാക്കോ ആയിരിക്കും അവള്‍ക്കു വേണ്ട ഉത്തേജകൗഷധം.

അപൂര്‍വം ചില സ്ത്രീകളില്‍, ക്ലിറ്റോറിസിനെ നേരിട്ട് ഉത്തേജിപ്പിക്കുമ്പോള്‍ ഉണ്ടാകുന്നതു പോലെ തന്നെയുള്ള രതിമൂര്‍ച്ഛ, ലൈംഗികഭാവനകളും ചിന്തകളും മാത്രം കൊണ്ട് ഉണ്ടാകുമെന്നു പഠനങ്ങളിലൂടെ ബാരി തെളിയിച്ചു (ഇക്കാര്യത്തിലും സ്ത്രീകള്‍ വളര്‍ന്ന സാഹചര്യത്തിനും സംസ്‌കാരത്തിനുമൊക്കെ സ്വാധീനമുണ്ട്.)

ശരീരസൗന്ദര്യത്തിന് ഏറെ പ്രാധാന്യമുണ്ട്. തോളു മുതല്‍ ഇടുപ്പുവരെയുള്ള അനുപാതം കൂടുതലുള്ള, പേശീദൃഢതയുള്ള, രോമാവൃതമായ ശരീരമുള്ള, ഘനഗാംഭീര്യമുള്ള ശബ്ദവും ദൃഢമായ താടിയെല്ലുകളുമുള്ള ആണത്തമുള്ള പുരുഷന്മാരോടാണത്രെ സ്ത്രീകള്‍ക്കു ചായ്‌വ്. പഴയ അതീവ ധീരന്‍-സുന്ദരന്‍-ബലവാന്‍-സങ്കല്‍പം തന്നെ. സാമൂഹികവും സാംസ്‌കാരികവും വികാരപരവുമായ ഘടങ്ങള്‍ അനുസരിച്ച് ഈ ഇഷ്ടത്തിലും വ്യത്യാസങ്ങള്‍ വരും.

2007-ല്‍ ഹോര്‍മോണ്‍സ് ആന്‍ഡ് ബിഹേവിയര്‍ ജേണലില്‍ പ്രസിദ്ധീകരിച്ച പഠനമനുസരിച്ച് അണ്ഡവിസര്‍ജനത്തോടനുബന്ധിച്ച ദിവസങ്ങളില്‍ സ്ത്രീകളുടെ ദിവാസ്വപ്നങ്ങളില്‍ കൂടുതല്‍ കടന്നുവരുക ഇത്തരം ആണത്തമുള്ള മസിലന്മാര്‍ ആയിരിക്കുമത്രെ. ഇതിന് ഒരു ജീവശാസ്ത്രപരമായ വിശദീകരണം കൂടിയുണ്ട്. ഈ സമയമാണ് സ്ത്രീകള്‍ക്ക് ഗര്‍ഭവതികളാകാന്‍ ഏറ്റവും അനുയോജ്യമായത്. ഏറ്റവും മികച്ച ഒരു തലമുറയെ സൃഷ്ടിക്കാനുള്ള ജൈവപരവും പ്രകൃത്യാലുള്ളതുമായ ചോദനയുടെ പരോക്ഷ പ്രതിഫലമാണത്രെ മികച്ച പുരുഷന്മാരേക്കുറിച്ചുള്ള ഈ പകല്‍ സ്വപ്നങ്ങള്‍.

ഒരു പുരുഷനെ ഇണയായി തെരഞ്ഞെടുക്കുമ്പോഴും ഇങ്ങനെയൊരു കരുതല്‍ സ്ത്രീക്കുണ്ട്. അതുകൊണ്ടാണ് സ്ത്രീ എപ്പോഴും ഗുണപരമായതും സ്ഥിരവുമായ ബന്ധങ്ങളോടു കൂടുതല്‍ താല്‍പര്യം കാണിക്കുന്നത്. അണ്ഡവിസര്‍ജന ദിനങ്ങളില്‍ സ്ത്രീകള്‍ ലൈംഗികമായി കൂടുതല്‍ ആക്ടീവായിരിക്കുമെന്നും ചില പഠനങ്ങള്‍ തെളിയിച്ചിട്ടുണ്ട്. ഈ സമയത്തു നടക്കുന്ന ഹോര്‍മോണ്‍ മാറ്റങ്ങളാണ് ലൈംഗികവികാരം തീവ്രമാക്കാന്‍ കാരണം.

ഇതിന്റെയൊക്കെ പ്രായം കഴിഞ്ഞില്ലേ…. എന്ന് മധ്യവയസെത്തുന്നതോടെ സ്ത്രീ ചോദിച്ചുതുടങ്ങും. ലൈംഗികവികാരങ്ങളുടെ കാര്യത്തില്‍ മാത്രമല്ല അവയുടെ ഏറ്റക്കുറച്ചിലുകളുടെ കാര്യത്തിലും വ്യത്യസ്തരാണ് സ്ത്രീ-പുരുഷന്മാര്‍ എന്നതു തന്നെ കാരണം. പുരുഷന്റെ ലൈംഗികവികാരം പ്രായമേറുമ്പോഴും വലിയ കുറവില്ലാതെ നിലനില്‍ക്കും. എന്നാല്‍ സ്ത്രീകളില്‍ പ്രായഭേദമനുസരിച്ച് ഏറ്റക്കുറച്ചിലുകള്‍ ഉണ്ടാകാം. ഒരു പ്രായം കഴിയുന്നതോടെ അവള്‍ ഉത്തരവാദിത്വമുള്ള കുടുംബിനിയും കുട്ടികളുടെ അമ്മയുമാകുന്നു. കാമുകിയുടെയും കിടപ്പറ പങ്കാളിയുടെയും വേഷങ്ങള്‍ കെട്ടിയാടുന്നത് അതോടെ കുറയുന്നു.

ലൈംഗികഅഭിനിവേശം ഇല്ലാതാകുന്നതല്ല പലപ്പോഴും ഇതിനു കാരണം. മറ്റു പല തിരക്കുകളും ഉത്തരവാദിത്വങ്ങളും മൂലം മാറ്റിവയ്ക്കാവുന്ന ഒന്നായ ലൈംഗികത അവഗണിക്കപ്പെടുകയാണ്. മുപ്പതുകളിലും നാല്‍പ്പതുകളിലുമുള്ള സ്ത്രീകള്‍ക്ക് ചെറുപ്പക്കാരികളെ അപേക്ഷിച്ച് കൂടുതല്‍ ലൈംഗിക അഭിനിവേശം കാണുമെന്നാണ് പഠനങ്ങള്‍ പറയുന്നത്. 18 വയസിനും 26 വയസിനുമിടയിലുള്ള പെണ്‍കുട്ടികളേക്കാള്‍ കൂടുതല്‍ രതിഭാവനകള്‍ കാണുന്നത് 27 വയസിനും 45 വയസിനും ഇടയിലുള്ള സ്ത്രീകളാണെന്നാണ് കണ്ടെത്തല്‍.

എന്നാല്‍, മധ്യവയസെത്തുന്നതോടെ ചിലരില്‍ ലൈംഗികവികാരം കുറയും. അതിന്റെ പ്രധാനകാരണം ആര്‍ത്തവവിരാമമാണ്. ആര്‍ത്തവം നിലയ്ക്കുന്നതോടെ സ്ത്രീ ശരീരത്തില്‍ ഈസ്ട്രജന്റെ അളവു കുറയുന്നു. ഇത് യോനീ വരള്‍ച്ചയുണ്ടാക്കും. തത്ഫലമായി ലൈംഗികബന്ധം വേദനാജനകമാകാം. മാത്രമല്ല, ഈസ്ട്രജന്റെ അളവു കുറയുന്നതു മൂലം വികാരോത്തേജന കേന്ദ്രങ്ങളിലെ സ്പര്‍ശനങ്ങള്‍ കാര്യമായ ഉത്തേജനവും നല്‍കില്ല. ലൈംഗികമായ തന്റെ ആകര്‍ഷത്വവും ഊര്‍ജവും കുറയുന്നു എന്ന ചിന്ത സ്ത്രീയുടെ ആത്മാഭിമാനത്തെ തന്നെ തകര്‍ത്തുകളയാം.

പുറമേ നിന്നു നോക്കുന്നത്ര നിഷ്‌ക്രിയമല്ല സ്ത്രീയുടെ ലൈംഗികവികാരലോകം. നിഗൂഢവും വന്യവുമായ അതിലെ ചുഴികളേയും മലരികളേയും തിരച്ചറിയാന്‍ ഇനിയും ഒരുപാട് കാതങ്ങള്‍ സഞ്ചരിക്കേണ്ടിവരും.

ഈസ്ട്രജന്‍, ടെസ്‌റ്റോസ്റ്റിറോണ്‍, പ്രൊജസ്‌ട്രോണ്‍ എന്നിവയാണ് സ്ത്രീ ലൈംഗികതയുമായി ബന്ധപ്പെട്ടു നില്‍ക്കുന്ന മൂന്നു ഹോര്‍മോണുകള്‍. ഇതില്‍ ടെസ്‌റ്റോസ്റ്റിറോണ്‍ ആണ് ഏറ്റവുമധികം പ്രാധാന്യമുള്ളത്. ഇത് അടിസ്ഥാനപരമായി ഒരു പുരുഷഹോര്‍മോണ്‍ ആണെങ്കിലും സ്ത്രീ ലൈംഗികതയില്‍ നിര്‍ണായകമായ പങ്കുണ്ട്. ഈസ്ട്രജന്‍ ഉല്‍പാദിപ്പിക്കപ്പെടാന്‍ ഈ ഹോര്‍മോണ്‍ സഹായിക്കുന്നു. ശരീരത്തില്‍ ഇതിന്റെ അളവു കൂടിയാല്‍ ലൈംഗികവികാരം വര്‍ധിക്കാന്‍ ഇടയാകും.

സ്ത്രീയുടെ സെക്‌സ് ഡ്രൈവ് ഭാഗികമായി നിയന്ത്രിക്കുന്നത് ഈസ്ട്രജനാണെന്നു പറയാം. അടിസ്ഥാനപരമായി ഇതൊരു സ്ത്രീ ഹോര്‍മോണ്‍ ആണ്. ലൈംഗികാവയവങ്ങളുടെ വളര്‍ച്ചയ്ക്കും ഈ ഹോര്‍മോണ്‍ ആവശ്യമാണ്. ആര്‍ത്തവവിരാമമാകുന്നതോടെ ഈ ഹോര്‍മോണിന്റെ ഉല്‍പാദനത്തില്‍ പ്രകടമായ കുറവുണ്ടാകാം.

കുട്ടികളുണ്ടാകാനുള്ള കഴിവില്ലായ്മ ദമ്പതികളെ ബാധിക്കുകയും പുരുഷന്മാരിലും സ്ത്രീകളിലും വൈകാരികവും മാനസികവുമായ വിഷമമുണ്ടാക്കുകയും ചെയ്യുന്നു. വിവിധ സാമൂഹിക, മാനസിക, സാമ്പത്തിക, ശാരീരിക പ്രത്യാഘാതങ്ങൾ ഉണ്ടായിരുന്നിട്ടും, വന്ധ്യത തടയലും പരിചരണവും പൊതുജനാരോഗ്യ പ്രശ്‌നങ്ങളിൽ അവഗണിക്കപ്പെടുന്നു, അല്ലെങ്കിൽ കുറഞ്ഞപക്ഷം അവ മുൻ‌ഗണനാ പട്ടികയിൽ താഴെയാണ്, പ്രത്യേകിച്ച് ജനസംഖ്യാ സമ്മർദ്ദത്തിൽ കഴിയുന്ന താഴ്ന്ന വരുമാനമുള്ള രാജ്യങ്ങളിൽ. അടുത്ത കാലത്തായി വന്ധ്യത തടയൽ, പരിചരണം, ചികിത്സ എന്നിവ അടിസ്ഥാന ആരോഗ്യ സേവനങ്ങളുമായി സമന്വയിപ്പിക്കുന്നതിനുള്ള അവബോധം വർദ്ധിക്കുന്നു.

ഒരു സ്ത്രീയെ സംബന്ധിച്ചിടത്തോളം, വന്ധ്യത (അല്ലെങ്കിൽ വന്ധ്യതയുടെ അവസ്ഥ) (WHO) സ്വയം പ്രത്യക്ഷപ്പെടാം:

• ഗർഭിണിയാകാനുള്ള കഴിവില്ലായ്മ
•  ഗർഭധാരണം നിലനിർത്താനുള്ള കഴിവില്ലായ്മ
•  ഒരു ഗർഭാവസ്ഥയെ കുഞ്ഞിന്റെ ജനനത്തിലേക്ക് കൊണ്ടുപോകാനുള്ള കഴിവില്ലായ്മ

സ്ത്രീകളുടെയും പുരുഷന്മാരുടെയും ഘടകങ്ങൾ വന്ധ്യതയ്ക്ക് കാരണമാകും. വന്ധ്യത പ്രശ്‌നങ്ങളിൽ മൂന്നിലൊന്ന് സ്ത്രീ വന്ധ്യത മൂലവും മൂന്നിലൊന്ന് പുരുഷ വന്ധ്യത മൂലവുമാണ്. ശേഷിക്കുന്ന സന്ദർഭങ്ങളിൽ വന്ധ്യത രണ്ട് പങ്കാളികളിലെയും പ്രശ്നങ്ങൾ മൂലമാകാം അല്ലെങ്കിൽ കാരണം വ്യക്തമല്ല.

സ്ത്രീ വന്ധ്യത പല ഘടകങ്ങളാൽ ഉണ്ടാകാം

ഫാലോപ്യൻ ട്യൂബുകൾക്ക് ക്ഷതം: ഫാലോപ്യൻ ട്യൂബുകൾക്ക് ഉണ്ടാകുന്ന ക്ഷതം, വിവിധ അണുബാധകൾ, എൻഡോമെട്രിയോസിസ്, പെൽവിക് സർജറി എന്നിവ മൂലമുണ്ടാകുന്ന പെൽവിക് ഇൻഫാമാറ്ററി ഡിസീസ് (പിഐഡി) ഫാലോപ്യൻ ട്യൂബുകൾക്ക് നാശമുണ്ടാക്കാം. ലൈംഗിക രോഗങ്ങൾ (എസ്ടിഐ) ആണ് പിഐഡികളുടെ സാധാരണ കാരണം.

അണ്ഡാശയ / ഹോർമോൺ പ്രവർത്തനം കാരണം:
ആർത്തവചക്രത്തിൽ ഹോർമോൺ മാറ്റങ്ങൾ സംഭവിക്കുന്നത്, അണ്ഡാശയത്തിൽ നിന്ന് അണ്ഡം പുറത്തുവരുന്നതിനും ഗർഭാശയത്തിനുള്ളിൽ ബീജസങ്കലനം ചെയ്ത അണ്ഡം (ഭ്രൂണം) തയ്യാറാക്കുന്നതിനായി ഗർഭപാത്രത്തിന്റെ ആന്തരിക പാളി (എൻഡോമെട്രിയം) കട്ടിയാക്കുന്നതിനും കാരണമാകുന്നു.

പോളിസിസ്റ്റിക് ഓവറി സിൻഡ്രോം (പി‌സി‌ഒ‌എസ്): സ്ത്രീകളുടെ വന്ധ്യതയുടെ സാധാരണ കാരണം പോളിസിസ്റ്റിക് ഓവറി സിൻഡ്രോം ആണ്.

ഫങ്ഷണൽ ഹൈപ്പോഥലാമിക് അമെനോറിയ: അമിതമായ ശാരീരിക (അത്‌ലറ്റുകളിൽ സാധാരണ) അല്ലെങ്കിൽ വൈകാരിക സമ്മർദ്ദം അമെനോറിയയ്ക്ക് കാരണമാകാം (ആർത്തവചക്രത്തിന്റെ അഭാവം).

കാലമേത്തുന്നതിനു മുൻപുള്ള അണ്ഡാശയ വാർദ്ധക്യം (premature ovarian aging ): അണ്ഡാശയ കരുതൽ കുറയുന്ന സ്ത്രീകൾക്ക് ഗർഭധാരണത്തിൽ ബുദ്ധിമുട്ട് അനുഭവപ്പെടാം.

അകാല അണ്ഡാശയ അപര്യാപ്തത (Premature ovarian insufficiency): സ്ത്രീ അണ്ഡാശയത്തിന് 40 വയസ് തികയുന്നതിനുമുമ്പ് പ്രവർത്തനം നിർത്തുന്നു. കാരണം സ്വാഭാവികമോ അല്ലെങ്കിൽ രോഗമോ, ശസ്ത്രക്രിയയോ, കീമോതെറാപ്പിയോ അല്ലെങ്കിൽ റേഡിയേഷനോ ആകാം.
ഗർഭാശയ സംബന്ധമായ കാരണങ്ങൾ അതായത്, ഗർഭപാത്രത്തിന്റെ അസാധാരണമായ ശരീരഘടന, ഫൈബ്രോയിഡുകൾ എന്നിവയുടെ സാന്നിധ്യം വന്ധ്യതയിലേക്ക് നയിച്ചേക്കാം.

സെർവിക്കൽ കാരണങ്ങൾ: ചില സ്ത്രീകൾക്ക് അസാധാരണമായ ശ്ലേഷ്മം( മ്യൂക്കസ്) ഉത്പാദനമോ അല്ലെങ്കിൽ ഗർഭാശയത്തിനു ഉണ്ടായിട്ടുള്ള ശസ്ത്രക്രിയയോ കാരണം ബീജത്തിന് സെർവിക്കൽ കനാലിലൂടെ കടന്നുപോകാൻ കഴിയാത്ത ഗർഭാശയ അവസ്ഥ ഉണ്ടായിരിക്കാം.(73)
വന്ധ്യതയ്ക്ക് കാരണമാകുന്ന പുരുഷ ഘടകങ്ങൾ
പുരുഷ വന്ധ്യത കേസുകളിൽ 90 ശതമാനത്തിലധികവും കുറഞ്ഞ ബീജങ്ങളുടെ എണ്ണം, ശുക്ലത്തിന്റെ ഗുണനിലവാരം അല്ലെങ്കിൽ ഇവ രണ്ടും ആണ്. വന്ധ്യതയുടെ ശേഷിക്കുന്ന ഘടകങ്ങൾ ശരീരഘടന പ്രശ്നങ്ങൾ, ഹോർമോൺ അസന്തുലിതാവസ്ഥ, ജനിതക വൈകല്യങ്ങൾ എന്നിവയുൾപ്പെടെ നിരവധി ഘടകങ്ങൾ കാരണമാകാം. ജനന വൈകല്യങ്ങൾ, രോഗങ്ങൾ (മം‌പ്സ് പോലുള്ളവ), കെമിക്കൽ എക്സ്പോഷർ, ജീവിതശൈലി എന്നിവ ഉൾപ്പെടെയുള്ള വ്യത്യസ്ത ഘടകങ്ങൾ ബീജങ്ങളുടെ അസാധാരണത്വത്തിന് കാരണമാകും.
സ്ത്രീക്കും പുരുഷനും പ്രജനനത്തെ ബാധിക്കുന്ന ഘടകങ്ങളിൽ ഇനിപ്പറയുന്നവ ഉൾപ്പെടുന്നു:

•  പരിസ്ഥിതി / തൊഴിൽ ഘടകങ്ങൾ
•  പുകയില, മരിജുവാന അല്ലെങ്കിൽ മറ്റ് മരുന്നുകളുമായി ബന്ധപ്പെട്ട വിഷഫലങ്ങൾ
• അമിതമായ വ്യായാമം
•  അമിതമായ ശരീരഭാരം അല്ലെങ്കിൽ അതുമായി ബന്ധപ്പെട്ട അപര്യാപ്തമായ ഭക്ഷണക്രമം
•  പ്രായം

സ്ത്രീ-പുരുഷ ഘടകങ്ങൾ വന്ധ്യതയ്ക്ക് കാരണമാകും. വന്ധ്യതയുടെ കാരണം വിലയിരുത്തുന്നതിന് വിശദമായ ശാരീരിക പരിശോധന ആവശ്യമാണ്. വന്ധ്യത ഉള്ള ദമ്പതികൾ ഗർഭം ധരിക്കാൻ ശ്രമിച്ച് 12 മാസം കഴിഞ്ഞോ അല്ലെങ്കിൽ ആറുമാസത്തിനുശേഷം സ്ത്രീ പങ്കാളിക്ക് 35 വയസ്സിന് മുകളിലോ അല്ലെങ്കിൽ അവരുടെ വന്ധ്യതയ്‌ക്കോ വ്യക്തമായ കാരണമുണ്ടെങ്കിൽ ഉടൻ പരിശോധന ആരംഭിക്കാം.

ബംഗളൂരു ആസ്ഥാനമായുള്ള മെഡിക്കൽ ടെക്‌നോളജി കമ്പനിയായ ഇനിറ്റോ നടത്തിയ പഠനമനുസരിച്ച് 27.5 ദശലക്ഷം ദമ്പതികൾ വന്ധ്യത അനുഭവിക്കുന്നു. കൂടാതെ, വിവാഹിതരായ ദമ്പതിമാരിൽ കുറഞ്ഞത് 10-15% പേർ പ്രജനവുമായി ബന്ധപ്പെട്ട പ്രശ്‌നങ്ങൾ നേരിടുന്നു.