Parenting

മക്കളെ കണ്ടും മാമ്പൂ കണ്ടും കൊതിക്കരുത് എന്നാണ് പഴഞ്ചൊല്ല്. രണ്ടും എപ്പോൾ വേണമെങ്കിലും അടർന്നു പോകാം. അതിനാൽ കൂടുതലൊന്നും ആലോചിച്ച് കൊതിക്കേണ്ട. വീട്ടിൽ പെൺകുട്ടികളാണെങ്കിൽ പിന്നെ. ഈ പറച്ചിൽ വേറൊരു രീതിയിലാവും. എന്തു ചെയ്‌തിട്ടെന്താ? അന്യന്‍റെ മുതലല്ലെ! പക്ഷേ.. പെൺകുട്ടികളെ കുറിച്ച് ഇങ്ങനെയൊക്കെ പറയാൻ വരട്ടെ. ഇപ്പോഴത്തെ കാലത്ത് ട്രെന്‍റ് മാറി വരുകയാണ്. ആൺകുട്ടികളെക്കാൾ പെൺകുട്ടികളാണത്രേ കുടുംബത്തെ സ്നേഹിക്കുന്നവർ. സ്വന്തം അച്‌ഛനമ്മമാരെ സംരക്ഷിക്കാൻ നല്ല മനസ്സ് കാട്ടുന്നതും കൂടുതൽ പെൺകുട്ടികളാണെന്ന് പറഞ്ഞാൽ അതിശയോക്തി ഇല്ല.

കുറച്ചു നാൾ മുമ്പാണ് ഈ സംഭവം. അമ്മയുടെ മൃതദേഹവുമായി നാല് പെൺ മക്കൾ സഹോദരന്‍റെ വീട്ടു വാതിൽക്കൽ മൂന്നു മണിക്കൂറോളം കാത്തിരുന്നു. ഹൈന്ദവവാചാരമനുസരിച്ച് മകനാണ് അന്ത്യകർമ്മം നടത്തേണ്ടത്. അതിനു വേണ്ടിയാണ് പെൺമക്കൾ അന്വേഷിച്ചു ചെന്നത്. എന്നാൽ മകൻ വാതിൽ തുറക്കാൻ പോലും തയ്യാറായില്ല. പിന്നെ പെൺമക്കൾ തന്നെ കർമ്മങ്ങൾ നടത്തി.

ഇതിന്‍റെ കാരണം എന്തു തന്നെ ആവട്ടെ. ജീവിതാന്ത്യം വരെ മക്കളുടെ സഹായം ലഭിക്കുമെന്ന പ്രതീക്ഷകൾ അസ്‌ഥാനത്താണെന്ന ധാരണകളെ തിരുത്തുന്നുണ്ട് ഈ സംഭവം. എന്നാൽ ആ ധാരണ തിരുത്തുന്നവരിൽ ഭൂരിപക്ഷം പെൺമക്കൾ തന്നെയാണെന്നാണ് പലരുടെയും അനുഭവം. ആൺമക്കൾ ചെയ്യുന്നില്ല എന്നല്ല ഇതിനർത്ഥം. പെൺകുട്ടികൾ മാത്രമുള്ള അച്‌ഛനമ്മമാർക്ക് പലപ്പോഴും തോന്നുന്ന അരക്ഷിതത്വത്തിന് ഇക്കാലത്ത് അടിസ്‌ഥാനമില്ല.

എന്നിട്ടും വീട്ടിൽ ആൺകുട്ടി പിറക്കുമ്പോൾ പെൺ പിറവിയേക്കാൾ കൂടുതൽ സന്തോഷിക്കുന്നവർക്ക് കുറവൊന്നുമില്ല. വീട്ടിൽ ആൺതരി ഉണ്ടെങ്കിലേ വംശം നിലനിൽക്കൂ എന്ന ചിന്താഗതി കൊണ്ടാണ് ഇങ്ങനെ സംഭവിക്കുന്നത്. എന്നാൽ ഇന്നത്തെ മാറിയ ജീവിത സാഹചര്യങ്ങളിൽ അച്‌ഛനമ്മമാരുമായി കൂടുതൽ മാനസികബന്ധം പുലർത്തുന്നത് പെൺമക്കൾ തന്നെയാണെന്നാണ് ഗവേഷകർ പറയുന്നൽ.

കൊല്ലംകാരിയായ കൃഷ്‌ണമ്മയ്‌ക്ക് 80 വയസ്സായി. രാത്രി ഉറക്കത്തിനിടയിൽ സീലിംഗ് ഫാൻ പൊട്ടി ദേഹത്തു വീണു. കോളർ ബോൺ പൊട്ടി അവർ ആശുപത്രിയിലുമായി. ഡോക്ടർ പരിപൂർണ്ണ വിശ്രമം നിർദ്ദേശിച്ചതോടെയാണ് പ്രശ്നങ്ങളുടെ തുടക്കം. വീട്ടിൽ വന്നശേഷം നോക്കാൻ ആളില്ല. മകന്‍റെ ഭാര്യയ്‌ക്ക് അതൊന്നും ചെയ്യാൻ ഇഷ്‌ടമില്ല. അതോടെ വഴക്കായി. പിന്നെ, സ്വന്തം മകൾ തന്നെ അമ്മയെ ഏറ്റെടുത്തു. അതും 300 കി.മീറ്ററുകൾക്കപ്പുറം താമസിക്കുന്ന അവർ ആംബുലൻസുമായി വന്ന് സ്വന്തം വീട്ടിലേയ്‌ക്ക് കൊണ്ടു പോയി.

ഇതുപോലുള്ള നിരവധി സംഭവങ്ങൾ നമുക്ക് ചുറ്റും നിരന്തരം കാണാറുണ്ട്. സ്വന്തം മക്കൾ വീട്ടിൽ വേണ്ടെന്ന് ആഗ്രഹിക്കേണ്ട സാഹചര്യം ഉള്ള വൃദ്ധജനങ്ങളെ പോലും കാണാം. രാംകുമാറിന്‍റെ കഥ അത്തരത്തിലുള്ളതാണ്. സർക്കാർ ജോലിയിൽ നിന്ന് 10 വർഷം മുമ്പ് അദ്ദേഹം റിട്ടയർ ചെയ്‌തു. ഭാര്യ നേരത്തെ മരിച്ചു പോയതാണ്. ഏകാകിയായി മാറിയ അദ്ദേഹം സ്വന്തം വീട്ടിൽ മകനും ഭാര്യയ്‌ക്കുമൊപ്പം ഒരുവിധം കഴിഞ്ഞു കൂടുകയായിരുന്നു. അപ്പോഴാണ് കാൻസർ എന്ന രോഗം അദ്ദേഹത്തെ പിടിക്കൂടിയത്. രോഗബാധിതനായപ്പോൾ തുടക്കത്തിൽ മകൻ ചികിത്സയ്‌ക്കു തയ്യാറായി. പിന്നെ മടിയായി. അപ്പോൾ മകൾ വന്ന് കൂട്ടിക്കൊണ്ടുപോയി.

“എന്‍റെ മകളാണ്. പിന്നീട് എന്നെ ജീവിതത്തിലേക്ക് കൂട്ടിക്കൊണ്ടു വന്നത്. അവളുടേത് ലവ്മാര്യേജ് ആയിരുന്നു. അന്ന് ഞങ്ങൾ എതിർത്ത് ഇറക്കി വിട്ടതുപോലുമാണ്. എന്നിട്ടും ജീവിതത്തിന്‍റെ പ്രതിസന്ധിഘട്ടത്തിൽ അവൾ തന്നെ തുണയായി.” രാംകുമാർ കണ്ണീരോടെ പറയുന്നു.

വൃദ്ധസദനങ്ങളിൽ കഴിയുന്നവരുടെ കുടുംബ പശ്ചാത്തലം പരിശോധിച്ചാൽ ഒരു കാര്യം പൊതുവായി മനസ്സിലാക്കാം. ആൺമക്കൾ ഉള്ളവർ തന്നെയാണ് ഇങ്ങനെ എത്തുന്നവരിൽ ഭൂരിഭാഗവും. പെൺകുട്ടികൾ മാത്രമുള്ളതിന്‍റെ പേരിൽ ഒറ്റപ്പെട്ടു പോയി. അനാഥാലയത്തിൽ എത്തുന്ന മാതാപിതാക്കൾ, നേരത്തെ പറഞ്ഞവരെ അപേക്ഷിച്ച് കുറവാണ്. ബാംഗ്ലൂരിലെ ഒരു വൃദ്ധസദനത്തിന്‍റെ നടത്തിപ്പുകാരിയായ ശകുന്തളാദേവി ചൂണ്ടിക്കാട്ടുന്നു. കേരളത്തിൽ വൃദ്ധ സദനങ്ങളിൽ എത്തുന്ന ഭൂരിഭാഗം പേരുടെയും പാശ്ചാത്തലം വ്യത്യസ്‌തമല്ല പലരുടെയും മക്കൾ വിദേശത്താണ്. 65കാരിയായ വിജയലക്ഷ്‌മിയുടെ മകൻ ഭാര്യയേയും കൂട്ടി മസ്‌കറ്റിലാണ് താമസം. വലിയ വീട്ടിൽ വിജയലക്ഷമി ഒറ്റയ്‌ക്കായി. അമ്മ ഒറ്റയ്‌ക്കാണല്ലോ എന്ന കാരണം പറഞ്ഞ് മകൻ മസ്‌ക്കറ്റിലേക്ക് അവരെ കൂട്ടിക്കൊണ്ടു പോയി. ഭാര്യയ്‌ക്കും തനിക്കും ജോലിക്കു പോകാൻ എളുപ്പമാകുമല്ലോ എന്നോർത്താണ് അമ്മയെ കൊണ്ടു പോയത്. കുറച്ചു നാൾ കഴിഞ്ഞപ്പോൾ അമ്മയുടെ ആരോഗ്യം ക്ഷയിച്ചു വന്നപ്പോൾ മകൻ അമ്മയെ നാട്ടിലെ വീട്ടിലേക്ക് കൊണ്ടു വിട്ടു. പിന്നെ അയൽവക്കക്കാരുടെ കാരുണ്യത്തിലായി അവരുടെ ജീവിതം.

അച്‌ഛനമ്മമാരെ പരിപാലിക്കേണ്ട കാലം വരുമ്പോൾ എന്തു കൊണ്ടാവാം ചില ആൺമക്കൾ ഇങ്ങനെ പെരുമാറുന്നത്. ജീവിത പ്രാരാബദ്ധ്യങ്ങൾ കൂടുമ്പോൾ അവരുടെ സെൻറിമെന്‍റ്സ് നഷ്‌ടപ്പെടുതയാണോ?

വയസ്സായ മാതാപിതാക്കളെ പരിചരിക്കാനും ശ്രദ്ധിക്കാനും ആഗ്രഹമുണ്ട്. എന്നാൽ ജോലിയുടെ പേരിൽ വീടു വിട്ടു നിൽക്കേണ്ടി വരുന്നതും അടിക്കടിയുള്ള ട്രാൻസ്ഫറും ജീവിതത്തെ അസ്‌ഥിരപ്പെടുത്തുന്നു. ഇതിനു പുറമെ വീട്ടുചെലവ് കുട്ടികളുടെ കാര്യങ്ങൾ ഇതെല്ലാം നോക്കേണ്ടി വരുന്നു. മിക്ക വീടുകളിലും ഭാര്യമാർ ഉദ്യോഗസ്‌ഥരായതോടെ അവരും തിരക്കിലായി. ഭർത്താവിന്‍റെ അമ്മയേയും അച്‌ഛനേയും പരിപാലിക്കേണ്ടത് തന്‍റെ മാത്രം ദൗത്യമല്ലെന്ന് കരുതിന്ന മരുമക്കളും ഉണ്ട്. പെൺമക്കൾ ഉണ്ടെങ്കിൽ രോഗശുശ്രൂഷ അവർ ചെയ്യട്ടെ എന്നു പറഞ്ഞ് മാറി നിൽക്കുന്ന മരുമക്കളും ഉണ്ട്.

അണുകുടുംബം എന്ന ചിന്ത വർദ്ധിച്ചതോടെ. വീട്ടിൽ നാലുപേരിൽ കൂടുതൽ വേണമെന്ന് പലരും കരുതുന്നുമില്ല. ഇങ്ങനെ വയസ്സു കാലത്ത് മാതാപിതാക്കൾ ഒറ്റപ്പെടാൻ ഇടയാവുന്ന സാഹചര്യങ്ങൾ നിരവധിയാണ്. ഇവിടെയെല്ലാം തന്നെ പ്രത്യാശ പെൺകുട്ടികളുള്ള മാതാപിതാക്കൾക്കാണ്. അച്‌ഛനമ്മമാരും, മക്കളും ഒരുപോലെ വിദ്യാഭ്യാസമുള്ള ഒരു കാലഘട്ടത്തിലും എന്തു കൊണ്ടിങ്ങനെ സംഭവിക്കുന്നു എന്നു ചോദിച്ചാൽ സ്വത്തുമായി ബന്ധപ്പെട്ട ചില ചിന്തകൾ ആണ് ഏറ്റവും പ്രധാന കാര്യമെന്നാണ് മനശാസ്‌ത്രജ്‌ഞയായ ദിവ്യയുടെ അഭിപ്രായം.

“ആൺമക്കൾക്കും പെൺമക്കൾക്കും തുല്യമായി സ്വത്ത് വീതം വയ്‌ക്കുന്നതാണ് ഇപ്പോഴത്തെ രീതി. അതിനാൽ അച്‌ഛനമ്മമാരുടെ കാര്യവും തങ്ങളുടെ മാത്രം ബാധ്യതയല്ല. പെൺമക്കളും ശ്രദ്ധിക്കണമെന്ന ചിന്ത ആൺമക്കൾ പൊതുവേ പ്രകടിപ്പിക്കാറുണ്ട്.”

പെൺമക്കൾ മാത്രമുള്ള അച്ഛനമ്മമാരുടെ ഏറ്റവും വലിയ ഭയം പ്രായമാകുമ്പോൾ ആരും കൂടെ ഉണ്ടാവില്ല എന്നാണ്. പെൺമക്കളെ കെട്ടിച്ചയച്ചാൽ പിന്നെ ആരാണുണ്ടാവുക? എന്നാൽ മാതാപിതാക്കളോട് വൈകാരികമായ അടുപ്പം പെൺമക്കൾക്കാണ് കൂടുതൽ തോന്നുക. മറ്റൊന്ന് സാമ്പത്തികമായ ഭദ്രതയും ഇക്കാലത്ത് പെൺകുട്ടികൾക്കുണ്ട്. ഭർത്താവിനെ ആശ്രയിക്കാതെ തന്നെ അവർക്ക് അച്‌ഛനമ്മമാരുടെ കാര്യങ്ങൾ നോക്കാനുള്ള സാമ്പത്തിക ശേഷി ഉളളതു കൊണ്ട് അവർ അതിനു സന്തോഷപൂർവ്വം തയ്യാറാകും. ഇനി മാതാപിതാക്കൾക്കുമുണ്ട് ചില രീതികൾ. സ്വന്തം മകളെ സ്നേഹിക്കുന്നത്ര മരുമകളെ സ്നേഹിച്ചെന്നു വരില്ല. അപ്പോൾ തിരിച്ചും അത്രയൊക്കെയല്ലേ പ്രതീക്ഷിക്കാൻ പറ്റൂ. മകളെപ്പോലെ തന്നെ മരുമകളെയും സ്നേഹിക്കുന്ന വീട്ടിൽ മാതാപിതാക്കൾക്ക് ഒറ്റപ്പെടൽ ഉണ്ടാകില്ല. മകളായാലും മരുമകളായാലും സ്നേഹം കൊടുത്തോളൂ… അതു ഇരട്ടിയായി തിരിച്ചു കിട്ടും. ഉറപ്പ്.

കൗമാരപ്രായത്തിൽ, പ്രേമമോ മറ്റൊരാളോടുള്ള ആകർഷണമോ തോന്നുന്നത് വളരെ സ്വാഭാവികമായ കാര്യമാണ്. ഈ പ്രായത്തിലെ ഇത്തരം കൂതൂഹലങ്ങളിൽ നിന്ന് രക്ഷപ്പെട്ട ഒരു വ്യക്തിയും ഇല്ല. കുട്ടികളുടെ ഈ പ്രായത്തിലെ കുഞ്ഞു പ്രണയങ്ങളെ എങ്ങനെ കൈകാര്യം ചെയ്യണമെന്ന് ഇപ്പോഴും പല മാതാപിതാക്കൾക്കും അറിയില്ല. ഏത് പ്രായത്തിലും ആർക്കും പ്രണയം സംഭവിക്കുമെന്ന് പറയപ്പെടുന്നു.

ഹൃദയം ഉണ്ടെങ്കിൽ പ്രണയം സംഭവിക്കും…

മൃഗങ്ങൾ പോലും സ്നേഹത്തെ തിരിച്ചറിയുന്നു. പ്രണയം എന്ന വികാരം, 60 വയസ്സുള്ള ഒരു ഹൃദയത്തെ കൗമാരക്കാരെ പോലെ മിടിക്കാൻ പ്രേരിപ്പിക്കുന്നു. അത്തരമൊരു സാഹചര്യത്തിൽ, കൗമാരത്തിന്‍റെ ആദ്യപടിയിലേക്ക് ചുവടുവെക്കുന്ന 13-15 വയസ്സുള്ള ഒരു കുട്ടിയിൽ ഇതേ പ്രണയം സംഭവിച്ചാൽ നിങ്ങൾ എന്ത് പറയും? കുട്ടിയുടെ വീട്ടിൽ കൊടുങ്കാറ്റ് വന്ന പ്രതീതി ആണ് പിന്നെ. അരുതാത്തത് സംഭവിച്ചതായി മാതാപിതാക്കൾ ചിന്തിക്കുന്നു, വീട്ടിൽ ആർക്കും അവരുടെ പ്രണയം അംഗീകരിക്കാൻ കഴിയുകയില്ല.

ടീനേജ് ലവ് വിജയിക്കാൻ കഴിയാത്തത് എന്തുകൊണ്ടാണെന്ന് നിങ്ങൾ എപ്പോഴെങ്കിലും ചിന്തിച്ചിട്ടുണ്ടോ? സ്കൂൾ ദിവസങ്ങളിൽ, ഈ സ്നേഹം പുസ്തകങ്ങളുടെ പേജുകളിൽ ഒതുങ്ങുന്നു. പക്വതയുള്ള പ്രണയത്തിലോ ബന്ധത്തിലോ ഉണ്ടാകുന്ന വിവാദങ്ങൾ പരിഹരിക്കാൻ ദമ്പതികൾ ശ്രമിക്കുന്നു, പക്ഷേ കൗമാരത്തിൽ ഇതുപോലൊന്ന് സംഭവിക്കുകയാണെങ്കിൽ, പരസ്പരം പിരിയാനുള്ള വഴികൾ തേടാൻ തുടങ്ങുന്നു.

തുടക്കത്തിൽ കൗമാര പ്രണയം അതിന്‍റെ ഉച്ചസ്ഥായിയിലാണെന്നത് ശരിയാണ്. സമൂഹത്തിന്‍റെ നിയന്ത്രണങ്ങളെക്കുറിച്ചുള്ള ഭയം ഇല്ലെങ്കിലും നിയന്ത്രണം അതിജീവിച്ച ആരും ഇല്ല. ഓരോ വ്യക്തിക്കും അവരുടെ സ്കൂൾ സമയത്ത് ഒരു ക്രഷ് ഉണ്ടായിരിക്കും. തങ്ങളുടെ ക്രഷ് പ്രണയമാക്കി മാറ്റാൻ ധൈര്യമുള്ളവർ കുറവാണ്.

കൗമാര പ്രണയം ഒരു സാധാരണവും സ്വാഭാവികവുമായ പ്രക്രിയയാണ്. ഹോർമോൺ മാറ്റങ്ങൾ കാരണം, ശാരീരികവും മാനസികവുമായ മാറ്റങ്ങൾ കുട്ടികളിൽ സംഭവിക്കുന്നു. ഒപ്പം ലൈംഗികതയ്ക്കുള്ള ആഗ്രഹം വർദ്ധിക്കുന്നത് സ്വാഭാവികമാണ്. സെക്സ് ആകർഷണമാണ് പ്രധാനമായും ഉണ്ടാകുന്നത്, ഈ ആകർഷണം ആർക്കും ആരുമായും ഉണ്ടാകാം..

2002 ൽ ഒരു സിനിമ ഇറങ്ങിയിരുന്നു.- ‘എ സ്മാൾ ലവ് സ്റ്റോറി ‘

ഇതിൽ, ഈ വിഷയം സൂക്ഷ്മമായി കാണിക്കുന്നുണ്ട്.. 15 വയസുള്ള ഒരു ആൺകുട്ടി തന്‍റെ വീടിന്‍റെ മുന്നിലുള്ള മറ്റൊരു ഫ്ലാറ്റിൽ താമസിക്കുന്ന ഒരു മുതിർന്ന സ്ത്രീയെ സ്ഥിരമായി എല്ലാ രാത്രിയിലും ബൈനോകുലർ ഉപയോഗിച്ച് കാണുകയും അവരുടെ എല്ലാ ചലനങ്ങളും നിരീക്ഷിക്കുകയും ചെയ്യുന്നു. ആ സ്ത്രീയുടെ കാമുകൻ അവളുടെ വീട്ടിലേക്ക് വരുന്നു, ആ കാമുകനും ആ സ്ത്രീയും സെക്സിൽ ഏർപെടുന്നു, അത് കണ്ട് ആ പതിനഞ്ചുകാരൻ ദേഷ്യപ്പെടുന്നു, ഒടുവിൽ അവൻ ആ സ്ത്രീയോട് തന്‍റെ പ്രണയം തുറന്നു പറയാൻ ധൈര്യപ്പെടുന്നു.

താൻ അവനു യോജിച്ച പെൺകുട്ടിയല്ലെന്ന് ആൺകുട്ടിയെ ബോധ്യപ്പെടുത്താൻ ആ സ്ത്രീ ശ്രമിക്കുന്നു. പക്ഷേ, അവൻ അതൊന്നും പ്രശ്‌നമില്ലെന്ന് പറയുന്നു, കാരണം അവൻ അവളെ സ്നേഹിക്കുന്നു. തുടർന്ന് ഇത് എതിർലിംഗത്തിലുള്ളവരുടെ ഒരു ആകർഷണം മാത്രമാണെന്ന് സ്ത്രീ അവനെ ബോധ്യപ്പെടുത്താൻ ശ്രമിക്കുന്നു.

സ്നേഹമില്ലാത്ത ആനന്ദത്തിന് 2 മിനിറ്റ് ദൈർഘ്യം മാത്രമേയുള്ളൂ എന്ന് ബോധ്യപ്പെടുത്താൻ ആ സ്ത്രീ അവനെ മാസ്റ്റർബേറ്റ് ചെയ്യാൻ സഹായിക്കുന്നു. 15 വയസ്സിൽ മസ്തിഷ്കം പക്വത ആർജിച്ചിട്ടില്ലെന്നു ഈ ചിത്രം കാണിക്കുകയും ചെയ്യുന്നു. പലതും അവന്‍റെ ഗ്രാഹ്യത്തിന് അതീതമാണ്. സ്ത്രീ വിട്ടുപോയപ്പോൾ മാനസികമായ പ്രയാസം നിമിത്തം അവൻ കൈയുടെ ഞരമ്പ് മുറിക്കുകയും ചെയ്യുന്നു.

ഇതൊരു സിനിമയായിരുന്നു, എന്നാൽ വാസ്തവത്തിൽ സംഭവിക്കുന്ന കാര്യങ്ങളും ആണ്. മനസ്സിൽ ഒരുതരം അഭിനിവേശം ഉണ്ടാകുന്ന തരത്തിലാണ് ഈ പ്രായം പ്രണയത്തെ ഉൾക്കൊള്ളുന്നത്. സ്നേഹത്തിന്‍റെ ലഹരി മനസ്സിൽ നിലനിൽക്കുന്നു. ഈ പ്രായത്തിലുള്ളവർക്ക് സ്വയം കണ്ടെത്താനോ അവർക്ക് എന്താണ് വേണ്ടതെന്നും അറിയാത്ത ഒരു പ്രയാസകരമായ സമയമാണ്.

ഇന്നത്തെ ആധുനിക ജീവിതശൈലിയും മാറുന്ന ജീവിതശൈലിയും ഇതിന് കൂടുതൽ പ്രചോദനം നൽകി. ഏഴാം ക്ലാസുകാരിയായ നമ്രത പറയുന്നത് കേൾക്കു., “എന്‍റെ സുഹൃത്തുക്കളിൽ ഭൂരിഭാഗവും ലവേഴ്സ് ആണ്. അത്തരമൊരു സാഹചര്യത്തിൽ, എനിക്ക് ഒരു ലവർ ഉണ്ടായിരുന്നില്ല, എനിക്ക് അതിൽ വലിയ വിഷമം തോന്നാറുണ്ടായിരുന്നു. ഇപ്പോൾ ഞാൻ എന്‍റെ ലവറിനോടൊപ്പം ഹാംഗ് ഔട്ട് ചെയ്യാറുണ്ട്.

ഇതിൽ അതിശയിക്കാനില്ല. ഇന്ന് കാമുകിയുടെയോ കാമുകന്‍റെയോ നില പ്രതീകാത്മകമായി തീർന്നിരിക്കുന്നു, പ്രണയിക്കാൻ ആൾ ഇല്ലെങ്കിൽ എന്നിൽ ആകർഷണമില്ലെന്ന് പെൺകുട്ടികൾ കരുതുന്നു, ആൺകുട്ടികൾ എന്നെ നോക്കുന്നില്ല എന്ന് ആശങ്കപ്പെടുന്നു. തിരിച്ചും.

കൗമാര പ്രണയം മറ്റു കാരണങ്ങൾ

കുടുംബത്തിൽ കുട്ടികൾക്ക് തനിച്ചു ധാരാളം സമയം ലഭിക്കുന്നു. ഇത്തരക്കരുടെ മാതാപിതാക്കൾ പുറത്ത് പോയി ജോലി ചെയ്യുന്നവരായിരിക്കാം, ന്യൂക്ലിയർ കുടുംബം ആയതിനാൽ കുട്ടി വീട്ടിൽ തനിച്ചായിരിക്കും. പക്ഷേ മാതാപിതാക്കൾ‌ക്ക് സമയമില്ല അല്ലെങ്കിൽ‌ കുട്ടിയെ ശ്രദ്ധിക്കാനുള്ള ക്ഷമയില്ല.

അതുപോലെ ജീവിതശൈലിയിൽ മാറ്റം വരുത്തുന്നത് കുട്ടികളെ സമ്മർദ്ദത്തിലാക്കുന്നു. അത്തരമൊരു സാഹചര്യത്തിൽ, സ്വയം ആശ്വാസം ലഭിക്കാൻ, അവർ പ്രണയത്തിലൂടെ പിന്തുണ തേടാൻ തുടങ്ങുന്നു. കൂടാതെ സുഭിക്ഷമായ ഭക്ഷണശീലം നിമിത്തം കൂടുതൽ ഊർജ്ജം ശരീരത്തിൽ ലഭിക്കുന്നത് ലൈംഗികാഭിലാഷം വർദ്ധിപ്പിക്കുന്നു.

കൗമാര പ്രണയം അസാധാരണമല്ല. ഇത് ഒരു സ്വാഭാവിക പ്രവർത്തനമാണ്, മിക്കവാറും ആളുകൾ ഈ ഘട്ടത്തിലൂടെ കടന്നുപോകുന്നു. കൗമാര പ്രണയം ഒരു മോശം കാര്യമല്ല, എന്നാൽ അതിന് പ്രാധാന്യം നൽകുന്നത് തീർച്ചയായും ആശങ്കാജനകമാണ്.

ഇത്തരം സാഹചര്യം എങ്ങനെ കൈകാര്യം ചെയ്യാം

കുട്ടികളിൽ നല്ല മൂല്യങ്ങളും സ്വഭാവ ശുദ്ധിയും നൽകാൻ മാതാപിതാക്കൾക്ക് കഴിയും. കുട്ടികളുടെ ജീവിതത്തിൽ എന്താണ് സംഭവിക്കുന്നതെന്ന് അച്ഛനമ്മമാർ അറിഞ്ഞിരിക്കണം.

കുട്ടികളുടെ മുന്നിൽ അമിതമായ ഉപദേശം പാടില്ല,, എന്നാൽ നിയന്ത്രണം വേണം താനും… അറിവുകൾ പുസ്തകങ്ങളിൽ നിന്നും അവർ പഠിക്കും, കുട്ടികളെ സഹായിക്കാൻ എപ്പോഴും ഉപദേശ മനോഭാവം സ്വീകരിക്കരുത്. മാതാപിതാക്കളെ ,നിങ്ങളും ഈ പ്രായത്തിലൂടെ കടന്നുപോയവരാണ്. അത് മറക്കരുത്. അവരുടെ പ്രണയത്തിന്‍റെ പേരിൽ അവരെ ശിക്ഷിക്കുന്നതിനുപകരം, അവരോട് ക്ഷമിക്കാൻ പഠിക്കുക..

തിരക്കിനിടയിൽ കുട്ടികളുടെ അവസ്ഥ അവഗണിക്കരുത്. അവരുടെ മാനസികാവസ്ഥ, സ്വഭാവം, മോഹങ്ങൾ, വിമുഖത എന്നിവ തീർച്ചയായും ശ്രദ്ധിക്കുക. കുട്ടിയോടുള്ള നിങ്ങളുടെ വിശ്വാസവും കുട്ടിക്ക് നിങ്ങളോടുള്ള വിശ്വാസവും മാത്രമേ കുട്ടികളെ തെറ്റായ പാതയിൽ നിന്ന് രക്ഷിക്കുകയുള്ളൂ.

ചിലപ്പോൾ പ്രണയത്തിൽ‌ വഞ്ചിക്കപ്പെടുകയോ അല്ലെങ്കിൽ‌ ബ്രേക്കപ്പ് ഉണ്ടാകുകയോ ചെയ്യാം. അത്തരമൊരു സാഹചര്യത്തിൽ,ചിലർക്ക് മാനസിക സമനില നഷ്ടപ്പെടുന്നു, അതിനുമുമ്പ് അവരെ ശ്രദ്ധിക്കണം. ഇതിനായി അവരുടെ പ്രവർത്തനങ്ങളിൽ ശ്രദ്ധ പുലർത്തേണ്ടത് പ്രധാനമാണ്.

നിങ്ങളുടെ കുട്ടി മറ്റൊരാളുമായി പ്രണയത്തിലാണെന്ന് നിങ്ങൾക്കറിയാമെങ്കിൽ, അത് അപക്വ പ്രായത്തിലുള്ള പ്രണയമാണെന്ന് അവനോട് പറയുക. കാലക്രമേണ കുറഞ്ഞു പോകാൻ, അല്ലെങ്കിൽ ഇല്ലാതാവാൻ സാധ്യതയുള്ള ആകർഷണം മാത്രമേയുള്ളൂ.

ഈ പ്രായത്തിൽ കുട്ടികൾ വളരെ സെൻസിറ്റീവാണ്. അവർ പ്രണയത്തിലാണെങ്കിൽ അവരെ പരിഹസിക്കരുത്. ഒരു ചങ്ങാതിയെന്ന നിലയിൽ അവരുടെ മനസ് മനസിലാക്കി സംസാരിക്കുക..

കുട്ടിയുടെ കാമുകിയെക്കുറിച്ചോ കാമുകനെക്കുറിച്ചോ പൂർണ്ണ വിവരങ്ങൾ നേടുകയും അവരുടെ വീട്ടിൽ സൗഹൃദപരമായി സംഭാഷണം നടത്തുകയും ചെയ്യുക. കൂടുതൽ പ്രയാസങ്ങൾ ഒഴിവാക്കാനും കുട്ടികളെ ശ്രദ്ധിക്കാനും ഇത് മൂലം കഴിയും.

ജന്മം കൊടുക്കുന്നതിലൂടെ ഒരു വലിയ കടമ നിറവേറ്റുന്ന അമ്മയ്ക്ക് ഗർഭം, പ്രസവം, പോഷകാഹാരം തുടങ്ങിയവയെക്കുറിച്ച് നല്ല അവബോധം ഉണ്ടായിരിക്കണം. അമ്മയുടെ അറിവും വൈദഗ്ധ്യവും നവജാതശിശുവിന്‍റെ വളർച്ചയെ വേണ്ടവിധത്തിൽ പോഷിപ്പിക്കും.

ആരോഗ്യ ശ്രദ്ധ

കുട്ടികൾ എപ്പോൾ വേണം അല്ലെങ്കിൽ രണ്ട് കുട്ടികൾ തമ്മിൽ എത്ര പ്രായ വ്യത്യാസമാകാം എന്നതിനെപ്പറ്റി ദമ്പതികൾ ആദ്യം തന്നെ തീരുമാനിക്കണം. പറ്റിപ്പോയി എന്ന നിലയിൽ ഗർഭം ധരിക്കാതിരിക്കാൻ ഇത് ഉപകരിക്കും. ആരോഗ്യമുള്ള ശിശുവിന് വേണ്ടി ഗർഭം ധരിക്കാൻ തീരുമാനമെടുക്കുന്ന കാലം മുതൽ ആരോഗ്യത്തിൽ ശ്രദ്ധിക്കണം. മുമ്പ് ഗർഭമലസൽ, വന്ധ്യതാ പ്രശ്നങ്ങൾ, മറ്റു സ്ത്രീ രോഗങ്ങൾ ഇവ വന്നിട്ടുണ്ടെങ്കിൽ അത് ഡോക്ടറോട് പറയുകയും ചികിത്സ ആവശ്യമുണ്ടെങ്കിൽ സ്വീകരിക്കുകയും വേണം.

ആസ്തമ, പ്രമേഹം, രക്തസമ്മർദ്ദം, ഹൃദ്രോഗം ഇവയുണ്ടായാലും ഗർഭം അലസാനുള്ള സാധ്യതയുണ്ടാവുന്നു. റൂബെല്ല, മീസത്സ്, ചിക്കൻപോക്സ് തുടങ്ങിയവ ഇക്കാലത്ത് വിരളമാണെങ്കിലും പ്രതിരോധ കുത്തിവയ്പുകൾ സ്വീകരിക്കുന്നത് നല്ലതാണ്. ഹൈപ്പറ്റൈറ്റിസ്-ബി, ടെറ്റനസ്സ് എന്നിവയ്ക്കെതിരെയും പ്രതിരോധ കുത്തിവയ്പെടുക്കണം. ഇതിനുശേഷം മൂന്നുമാസം കഴിഞ്ഞ് ഗർഭം ധരിക്കുന്നതാണ് അഭികാമ്യം.

പങ്കാളിയുടെ ആരോഗ്യം

ആരോഗ്യമുള്ള മാതാപിതാക്കൾക്ക് ആരോഗ്യമുള്ള കുട്ടികൾ ഉണ്ടാകാനുള്ള സാധ്യത പതിന്മടങ്ങാണ്. ഗുണമേന്മയിലും അളവിലും ഉയർന്ന നിലവാരത്തിലുള്ള ശുക്ലം ആരോഗ്യമുള്ള കുഞ്ഞിനെ പ്രദാനം ചെയ്യും. പിരിമുറുക്കം, പുകവലി, പോഷകാഹാരക്കുറവ്, അന്തരീക്ഷ മലിനീകരണം, രാസവസ്തുക്കളും വിഷാന്തരീക്ഷവുമുള്ള ജോലിസ്‌ഥലം എന്നീ കാരണങ്ങൾ ശുക്ലത്തിന്‍റെ രൂപീകരണത്തേയും ബീജങ്ങളുടെ വളർച്ചയേയും സാരമായി ബാധിക്കുന്നു. കുഞ്ഞ് വേണമെന്നാഗ്രഹിക്കുന്നതു തൊട്ട് മൂന്നുമാസത്തേക്ക് ഗർഭധാരണത്തിന് തയ്യാറെടുക്കാം.

ഈ മൂന്നുമാസങ്ങളിൽ ഉള്ളിൽ ഗർഭനിരോധന മാർഗ്ഗങ്ങളുടെ ഉപയോഗം നിർത്തണം. രണ്ടു തവണയെങ്കിലും സാധാരണ രീതിയിലുള്ള മാസമുറ ഉണ്ടാകാനാണിത്. ഗർഭനിരോധന ഉറ ഈ കാലങ്ങളിൽ ഉപയോഗിക്കാം. ഗർഭ നിരോധന ശ്രേണിയിലുള്ള ചില മരുന്നുകൾക്ക് വിറ്റാമിനുകളും ധാതുക്കളും വലിച്ചെടുക്കുവാനുള്ള ശരീരത്തിന്‍റെ കഴിവ് കുറയ്ക്കാനാകുമെന്ന് പഠനങ്ങൾ തെളിയിച്ചിട്ടുണ്ട്. ഗർഭാശയ സംബന്ധമായ രോഗങ്ങളൊന്നും ഇല്ലെന്ന് ഉറപ്പ് വരുത്തണം.

ഭക്ഷണക്രമം

ഗർഭിണിയാകുന്നതിന് മുമ്പ് തന്നെ ചിട്ടയായ ഭക്ഷണക്രമം പാലിക്കുകയാണെങ്കിൽ കുഞ്ഞിന്‍റെ ആരോഗ്യം ഭയപ്പെടാനിടയില്ലാത്തതായിത്തീരും. ഗർഭകാലത്തെ വിളർച്ച, മാസം തികയാതെയുള്ള പ്രസവം എന്നിവ ഒഴിവാക്കാനും പോഷകാഹാരം സഹായിക്കും. പഴങ്ങൾ, പച്ചക്കറികൾ, ധാന്യങ്ങൾ, കൊഴുപ്പ് കുറഞ്ഞ മാംസം, കൊഴുപ്പ് കുറഞ്ഞ പാലുല്പന്നങ്ങൾ എന്നിങ്ങനെ കാർബോഹൈഡ്രേറ്റ്സ് അടങ്ങിയ ഭക്ഷണം ഗർഭകാലത്തിന് മുമ്പ് ശീലമാക്കണം. കാൻഡി, കാർബണേറ്റ് പാനീയങ്ങൾ, എണ്ണയിൽ വറുത്ത ഭക്ഷ്യ സാധനങ്ങൾ, കാപ്പി, ചായ, കോള തുടങ്ങിയവ ഒഴിവാക്കുകയും വേണം. കഫീൻ കൂടിയ അളവിൽ ശരീരത്തിൽ എത്തിയാൽ ഗർഭം അലസാൻ പോലും ഇടയാക്കും.

ഇലക്കറികൾ, മുളപ്പിച്ച ധാന്യങ്ങൾ, ബീൻസ്, കോളിഫ്ളവർ, അരിയാഹാരം, ഓറഞ്ച്, നാരങ്ങ, മുസമ്പി, വാഴപ്പഴം, പാൽ, തൈര്, ചീസ് ഇവയിൽ നിന്നെല്ലാം ശരീരത്തിനാവശ്യമായ ഫോളിക് ആസിഡ് ലഭിക്കും. തൂക്കം ഉയരത്തിനനുസരിച്ച് ആനുപാതികമാണോ എന്ന് നോക്കുക. കൂടുതലായാലും കുറവായാലും ക്രമീകരിച്ചെടുക്കണം.

ഫിറ്റ്നസ്സ്

ഗർഭധാരണത്തിന് മുമ്പ് വ്യായാമം ശീലിക്കുന്ന സ്ത്രീക്ക് ഗർഭകാലം മുഴുവൻ ഫിറ്റ്നസ്സ് നിലനിർത്താൻ സാധിക്കും. ഗർഭ സംബന്ധമായി വരുന്ന അമിതഭാരം താങ്ങാനും ശരീരത്തിലെ പേശികൾക്ക് ഉറപ്പ് കിട്ടാനും വ്യായാമം സാധിക്കും. മൂലക്കുരു, വെരിക്കോസ് എന്നീ രോഗങ്ങളും വ്യായാമം വഴി അകറ്റാവുന്നതേയുള്ളൂ. നല്ല ഉറക്കം ലഭിക്കാനും വ്യായാമം ചെയ്യുന്നത് നല്ലതാണ്.

ലിഫ്റ്റിന് പകരം കോണിപ്പടി ഉപയോഗിക്കുകയാണെങ്കിൽ ഹൃദയമിടിപ്പിന്‍റെ താളം, ശരീരത്തിലെ ഓക്സിജൻ സഞ്ചാരം, കൊഴുപ്പ് ഉരുക്കൽ, ശരീരം മുഴുവനുമുള്ള പേശികളുടെ ഉറപ്പ് എന്നിവയ്ക്ക് സഹായകമാകുന്നു. നീന്തൽ, ഓട്ടം, ടെന്നീസ് ഇവ ശരീരത്തിന്‍റെ മൊത്തം പേശികൾക്ക് ഉറപ്പ് നൽകും. വ്യായാമം നൽകുന്ന ഊർജ്ജസ്വലത മൂന്ന് നാലാഴ്ചകൾക്കുള്ളിൽ നിങ്ങൾക്കു തന്നെ തിരിച്ചറിയാനാകും. പതിവായി ചെയ്യുമ്പോൾ കിതപ്പനുഭവപ്പെടാതെ വ്യായാമത്തിലേർപ്പെടാൻ സാധിക്കും. ഗർഭമലസൽ, മാസം തികയാതെയുള്ള പ്രസവം എന്നിവ ഉണ്ടായിട്ടുണ്ടെങ്കിൽ വ്യായാമം ചെയ്യുന്നതിന് മുമ്പ് ഡോക്ടറുടെ ഉപദേശം തേടണം.

ഗർഭകാലത്ത് നല്ല ഭക്ഷണം

ഗർഭകാലത്ത് പോഷക സമ്പുഷ്ടമായ ഭക്ഷണം ധാരാളം കഴിക്കണം. കാരണം അമ്മയ്ക്കും കുഞ്ഞിനും വേണ്ട ആഹാരം ശരീരത്തിലെത്തേണ്ടതുണ്ട്. ഇറച്ചി, മീൻ, മുട്ട, പാൽ, ചീസ്, ധാന്യങ്ങൾ, പരിപ്പ് വർഗ്ഗങ്ങൾ എന്നിവയിൽ പ്രോട്ടീൻ ധാരാളമുണ്ട്. ഉരുളക്കിഴങ്ങ്, തവിടുള്ള ചോറ്, അരി, ഗോതമ്പ് ഇവ കാർബോഹൈഡ്രേറ്റിന്‍റെ കലവറയാണ്. ഫലങ്ങളും പച്ചക്കറികളും ഭക്ഷണത്തിൽ ഉൾപ്പെടുത്തുമ്പോൾ വൈറ്റമിൻ കുറവുകൾ പരിഹരിക്കപ്പെടും.

ഭക്ഷണ പ്രശ്നങ്ങൾ

ദഹനക്കുറവ്, നെഞ്ചെരിച്ചിൽ എന്നിവ ചില ഗർഭിണികളിൽ കണ്ട് വരാറുണ്ട്. മസാല അധികം ഉപയോഗിക്കരുത്. കൂടാതെ സോസുകൾ, പ്രിസർവ് ചെയ്‌ത മാംസ ഭക്ഷണം, ഐസ്ക്രീം എന്നിവ ഒഴിവാക്കുന്നത് നല്ലതാണ്.

നവജാത ശിശു

ശിശു പൂർണ്ണ ആരോഗ്യവാനാണെങ്കിൽ ഒരു മണിക്കൂറിനുള്ളിൽ തന്നെ പ്രതികരണശേഷി കാട്ടിത്തുടങ്ങും. അവൻ ജാഗരൂകനുമായിരിക്കും. കഴിയുന്നത്ര അവനെ അമ്മയോട് ചേർത്ത് കിടത്തുക. മുറി ഊഷ്മളതയുള്ളതാണെങ്കിൽ പോലും ചൂടുള്ള ടൗവ്വലോ തുണിയോ ഉപയോഗിച്ച് കുഞ്ഞിനെ പൊതിയണം. ശിശുവിനോട് മൃദുവായി സംസാരിച്ച് നോക്കാം. അവൻ നിങ്ങളുടെ ശബ്ദം തിരിച്ചറിഞ്ഞു കൊള്ളട്ടെ. എന്തു പറയണമെന്നോർത്ത് വിഷമിക്കേണ്ട. അവസരത്തിനൊത്ത് വാക്കുകൾ സ്വാഭാവികമായി വന്നുകൊള്ളും.

ശിശുവിന്‍റെ ആകൃതിയും പ്രകൃതിയും

ആരുടെയെങ്കിലും ഛായയോ പ്രത്യേകിച്ച് സൗന്ദര്യമോ വനജാത ശിശുക്കൾക്ക് ഉണ്ടാകുകയില്ല. ചുവന്ന് തുടുത്ത് സദാ പുഞ്ചിരിക്കുന്ന കുഞ്ഞിനെ ജനന സമയത്ത് പ്രതീക്ഷിക്കരുത്. ശിശുവിന്‍റെ നീളത്തിന്‍റെ നാലിലൊന്ന് തലയായിരിക്കും. സാധാരണ പ്രസവമാണെങ്കിൽ കുഞ്ഞിന്‍റെ തലയ്ക്ക് ശരിയായ ആകൃതി ഉണ്ടായിരിക്കണമെന്നില്ല. അമ്മയുടെ ഗർഭപാത്രത്തിൽ നിന്നും പുറത്ത് വരുന്ന വഴി, തലയോട്ടിയിലെ എല്ലുകൾക്ക് സ്‌ഥാനചലനം സംഭവിക്കാറുണ്ട്. ശിശുവിന്‍റെ ശിരസ്സിൽ ചെറിയ കുഴിവുകളായും നീളത്തിലുള്ള ചുളിവുകളായും ഇതിന്‍റെ പരിണിതഫലം കാണാൻ കഴിയും. വിദഗ്ധനായ ഡോക്ടറുടെ കീഴിലല്ലാത്ത സിസേറിയൻ പ്രസവങ്ങളിലും കുഞ്ഞിന്‍റെ തലയ്ക്ക് ആകൃതിയില്ലായ്മ ഉണ്ടാവാം. തലയിലൂടെ കുഞ്ഞിന്‍റെ നാഡിമിടിപ്പ് അറിയാൻ സാധിക്കും.

ചില കുട്ടികൾ നിറയെ തലമുടിയായി ജനിക്കുമ്പോൾ മറ്റ് ചില കുട്ടികൾ കഷണ്ടി രൂപത്തിലായിരിക്കും ജനിക്കുക. ഇത് പിന്നീട് ശരിയായിക്കൊള്ളും. കൃഷ്ണമണിയുടെ നിറം പോലും പിന്നീട് മാറാറുണ്ട്. വീർത്ത കൺപോളകൾക്കിടയിലൂടെ കണ്ണുചിമ്മിയാണ് നവജാതശിശു നോക്കുക. കണ്ണുകൾക്ക് ഫോക്കസ് ചെയ്യാനുള്ള കഴിവ് അപ്പോൾ ഉണ്ടായെന്നുവരില്ല. പതിഞ്ഞ മൂക്ക്, അകത്തേക്കിരിക്കുന്ന താടി, ചതവ് പറ്റിയതു പോലിരിക്കുന്ന കവിളുകൾ എന്നിവയും നവജായ ശിശുക്കളുടെ പ്രത്യേകതകളാണ്.

ജനനത്തിന് തൊട്ടുമുമ്പ് മാതൃശരീരത്തിൽ നിന്നും ചില ഹോർമോണുകൾ പ്ലസൻറയിലേക്ക് തള്ളിക്കയറുന്നത് മൂലം ശിശുവിന്‍റെ പ്രത്യുല്പാദന അവയവങ്ങൾ വീർത്തതായി കാണപ്പെടാം. ആൺപെൺഭേദമില്ലാതെ ശിശുക്കളുടെ മാറിടവും വീർത്തിരിക്കും. മുലഞെട്ടുകളിൽ നിന്ന് പാലിന് സമാനമായ ഒരു ദ്രാവകവും അപൂർവ്വമായി കണ്ട് വരാറുണ്ട്. ഇവയെല്ലാം ഏതാനും ദിവസങ്ങൾക്കുള്ളിൽ മാറിക്കൊള്ളും.

ബന്ധം

സ്നേഹപൂർണ്ണമായ ഇഴയടുപ്പമുള്ള ഒരു ബന്ധം സ്ഥാപിക്കാനായി ജനനത്തിന് ശേഷം ശിശുവും അമ്മയുമായി കുറച്ച് സമയം ചെലവാക്കണമെന്ന് മനഃശാസ്ത്രജ്ഞന്മാർ നിർദ്ദേശിക്കാറുണ്ട്. അമ്മയ്ക്ക് വേഗം തന്നെ കുഞ്ഞിനെ സ്നേഹിക്കാനും അറിയാനും ഇത് ഉപകരിക്കും. കുഞ്ഞിന്‍റെ ഭൂമിയിലെ ആദ്യ നിമിഷങ്ങൾ സ്നേഹപൂർണ്ണമായിരുന്നാൽ അവന്‍റെ ആരോഗ്യത്തിന് അത് ഗുണം ചെയ്യും. പ്രസവം അമ്മയെ ഞെട്ടിപ്പിക്കുകയോ ക്ഷീണിപ്പിക്കുകയോ ചെയ്‌തിട്ടുണ്ടെങ്കിൽ മാതൃസ്നേഹം ഉണ്ടായിവരാൻ ചിലപ്പോൾ താമസം നേരിട്ടേക്കാം. ശിശുവിനോട് ദിവസവും സ്നേഹപൂർവ്വം ഇടപെടുമ്പോൾ അമ്മയുടെ ശബ്ദവും മണവുമെല്ലാം കുഞ്ഞ് വേഗം തിരിച്ചറിയും. ഗർഭകാലം, പ്രസവം, ശിശുപരിപാലനം എന്നീ ജീവിതാവസ്‌ഥകൾ ധാരാളം വികാരങ്ങൾ മനസ്സിലുണ്ടാക്കുന്ന കാലമാണ്.

ശിശുവിന്‍റെ ആരോഗ്യം

കുഞ്ഞ് ജനിച്ചയുടൻ നീളം, തലയുടെ ചുറ്റളവ്, തൂക്കം ഇവ രേഖപ്പെടുത്തി വയ്ക്കണം. 2.5 കി.ഗ്രാം മുതൽ 4.25 ഗ്രാം വരെ തൂക്കവുമായാണ് 95 ശതമാനം കുഞ്ഞുങ്ങളും ജനിക്കുന്നത്. 46 സെ.മീ മുതൽ 56 സെ.മീ വരെ നീളവും നവജാത ശിശുവിന് ഉണ്ടാകും. 33 മുതൽ 37 സെ.മീ വരെ ചുറ്റളവ് തലയ്ക്ക് ഉണ്ടാകും. ക്രമരഹിതമായ ഹൃദയമിടിപ്പാണെങ്കിൽ ഹൃദയസംബന്ധമായ അസുഖങ്ങൾക്ക് സാധ്യതയുണ്ട്. അമ്മയുടെ യോനിയിൽ അണുബാധയുണ്ടെങ്കിൽ ശിശുവിന്‍റെ കണ്ണുകളിൽ അണുബാധ പ്രത്യക്ഷപ്പെടാം.

ജനിച്ച് രണ്ട് ദിവസത്തിനുള്ളിൽ കുട്ടിക്ക് മഞ്ഞനിറം ബാധിക്കുന്നത് സാധാരണ പ്രതിഭാസമാണ്. ആദ്യ ദിവസങ്ങളിൽ കരൾ വേണ്ട വിധത്തിൽ പ്രവർത്തനം ആരംഭിച്ചിട്ടുണ്ടാകില്ല. ഇതിന്‍റെ ഫലമായി കരൾ ഉൽപ്പാദിപ്പിക്കുന്ന ബിലിറൂബിൻ എൻസൈം രക്‌തത്തിൽ കലരുന്നു. നാലാം ദിവസം ഇത് താനേ ഇല്ലാതായിപ്പൊക്കോളും. അല്പം വെയിൽ കൊണ്ടാൽ മാത്രം മതി. മഞ്ഞനിറം നീണ്ടു നിൽക്കുകയാണെങ്കിൽ മഞ്ഞപ്പിത്തമായി തീർന്നേക്കാം.

15,000 ൽ ഒരു കുട്ടിക്ക് വീതം ലോകത്ത് കണ്ടു വരുന്ന അസുഖമാണ് ഫിനിൽകെറ്റോനോറിയ. പ്രോട്ടീനിൽ കണ്ടുവരുന്ന അമിനോ ആസിഡ്- ഫൈനിലെലാനിനെ ലയിപ്പിക്കാൻ ശരീരത്തിന് കഴിയാതെ വരുന്ന പ്രതിഭാസമാണ് ഇത്. തലച്ചോറിനെ നശിപ്പിക്കുന്ന രോഗമായതിനാൽ കൗമാര കാലം വരെ ചിലപ്പോൾ ചികിത്സ തേടേണ്ടി വരും.

കുഞ്ഞിന് മുലപ്പാൽ ധാരാളമായി നൽകണം. ആരോഗ്യം വർദ്ധിപ്പിക്കുകയും പ്രതിരോധശേഷി നൽകുകയും ചെയ്യും. മാനസിക സമ്മർദ്ദം അമ്മമാരിൽ പാൽ കുറയാൻ ഇടയാക്കുന്നുണ്ട്.

സ്കൂൾ കാലം വരെ കുട്ടിയെ മുടക്കം വരുത്താതെ പരിശോധനകൾക്ക് വിധേയമാക്കണം. ഏതെങ്കിലും വിധത്തിലുള്ള ന്യൂനതകൾ കുട്ടിക്കുണ്ടാവാതിരിക്കാൻ ഇത് ഗുണം ചെയ്യും.

കൗമാരക്കാരുടെ ജീവിതത്തിൽ അത്ഭുതമുണ്ടാക്കുന്നതും ആശയക്കുഴപ്പം സൃഷ്ടിക്കുന്നതുമായ ദുരൂഹതനിറഞ്ഞ പ്രായമാണ് പ്രായപൂർത്തിയാകുന്ന കാലം.

കൗമാരക്കാര്‍ മുതിര്‍ന്ന് ലൈംഗിക പക്വത നേടി സന്താനോത്പാദനത്തിന് കഴിവു നേടുന്ന കാലഘട്ടമാണിത്. പ്രായപൂര്‍ത്തിയാവുന്നതുമായി (Puberty) ബന്ധപ്പെട്ട് നിരവധി ശാരീരിക മാനസിക വ്യതിയാനങ്ങള്‍ ഉണ്ടാകുന്നതിനൊപ്പം ദ്വിതീയ ലൈംഗിക സ്വഭാവ സവിശേഷതകളും വികാസം പ്രാപിക്കുന്നു.

ഹോര്‍മോണ്‍ വ്യതിയാനങ്ങളുടെ ഒരു ശൃംഖലയോടുകൂടിയാണ് പ്രായപൂര്‍ത്തിയാവുന്ന പ്രക്രിയ നടക്കുന്നത്. തലച്ചോറില്‍ നിന്നുള്ള ആവേഗങ്ങള്‍ പിറ്റ്യൂറ്ററി ഗ്രന്ഥിക്കും തുടര്‍ന്ന് ഈസ്ട്രജനും ലഭിക്കുന്നതോടെയാണ് ഇതിന്റെ തുടക്കം. ഇത് പ്രായപൂര്‍ത്തിയാവുന്നതിനുള്ള ശാരീരിക മാറ്റങ്ങള്‍ക്ക് കാരണമാവുന്നു. നാലോ അഞ്ചോ വര്‍ഷങ്ങള്‍ കൊണ്ടാണ് പ്രായപൂര്‍ത്തിയാവുന്ന പ്രക്രിയ പൂര്‍ത്തിയാവുന്നത്. ഇത് ആണ്‍കുട്ടികളെക്കാള്‍ മുൻപേ പെണ്‍കുട്ടികളിലാണ് പ്രകടമാവുന്നത്. ഇതിലേക്കുള്ള ആദ്യ മാറ്റങ്ങള്‍ 10 – 13 വയസ്സിനിടെ പ്രകടമാവും.

പക്ഷെ ഇപ്പോൾ 8 -9 വയസ്സാകുമ്പോഴേക്കും കുട്ടികള്‍ പ്രായപൂർത്തിയാകുന്നുണ്ട്. വളരെ പെട്ടെന്ന് ലൈംഗികവളര്‍ച്ച നേടുന്നതില്‍ അവരുടെ ആഹാരശീലങ്ങളും പോഷകാഹാര ലഭ്യതയും മറ്റും കാരണമാകുന്നില്ലേ? ഹോര്‍മോണ്‍ കുത്തിവെച്ചു വളര്‍ത്തിയെടുത്ത ബ്രോയിലര്‍ കോഴികള്‍ ഭക്ഷണമേശയിലെ ഇഷ്ടവിഭവമാകുമ്പോള്‍ പെണ്‍കുട്ടികളില്‍ കാലമെത്താതെ ലൈംഗികവളര്‍ച്ചയുണ്ടാകാന്‍ അതു കാരണമാകുന്നു എന്ന അസ്വാസ്ഥ്യജനകമായ കണ്ടെത്തലും ഈയിടെ ഉണ്ടായിട്ടുണ്ടല്ലോ.

പ്രായപൂര്‍ത്തിയാവുന്നതുമായി ബന്ധപ്പെട്ട് ആണ്‍കുട്ടികളിലും പെണ്‍കുട്ടികളിലും ശാരീരികമാറ്റത്തോടൊപ്പം മാനസികമാറ്റങ്ങളും വരുന്നുണ്ട്. പ്രായപൂര്‍ത്തിയാവുന്നതുമായി ബന്ധപ്പെട്ട് ആണ്‍കുട്ടികളിലും പെണ്‍കുട്ടികളിലും ഉണ്ടാവുന്ന മാനസിക വ്യതിയാനങ്ങള്‍
സ്വന്തം ശരീര സൗന്ദര്യത്തില്‍ അതൃപ്തി,ആത്മാഭിമാനം കുറയുക, മാനസികാവസ്ഥയില്‍ പെട്ടെന്നുണ്ടാകുന്ന മാറ്റം,ഏകാധിപത്യപരമായ പെരുമാറ്റം,ലൈംഗികാവശ്യങ്ങള്‍ എന്നിവയാണ് .

കൂട്ടുകാരിൽ നിന്നുള്ള അപക്വമായ അറിവുകൾ അവരെ കൂടുതൽ ചിന്താകുഴപ്പത്തിലാക്കിയേക്കാം. ഈ ഘട്ടത്തിൽ അമ്മമാർക്ക് അവരെ സഹായിക്കാൻ കഴിയും.അമ്മ കൗമാരക്കാരായ പെൺമക്കൾക്ക് കൂട്ടുകാരിയാകുന്നതുപോലെ തന്നെ അച്ഛൻ ആൺകുട്ടികൾക്കും മാതൃകയാവണം. സമൂഹത്തിൽ ഇന്ന് കാണുന്ന പല പ്രശ്ങ്ങൾക്കുമുള്ള പരിഹാരമാണിത്.

പ്രായപൂര്‍ത്തിയാകുമ്പോൾ ആണ്‍കുട്ടികളില്‍ ഉണ്ടാകുന്ന മാറ്റങ്ങള്‍

ജനനേന്ദ്രിയത്തിലുണ്ടാവുന്ന മാറ്റം
വൃഷണങ്ങള്‍ വലുതാകുകയും വൃഷണസഞ്ചി നേര്‍ത്തതാകുകയും ചുവന്ന നിറത്തിലാകുകയും ചെയ്യുന്നതാണ് ഏറ്റവുമാദ്യം കാണപ്പെടുന്ന മാറ്റങ്ങളിലൊന്ന്.

ലിംഗത്തിന്റെ ചുവട്ടിലായി പ്യൂബിക് രോമങ്ങള്‍ വളരാന്‍ ആരംഭിക്കും.ലിംഗം വളര്‍ന്ന് വലുതാകുകയും വൃഷണസഞ്ചിയുടെ ചര്‍മ്മം കറുത്തു തുടങ്ങുകയും ചെയ്യും.പ്യൂബിക് രോമങ്ങള്‍ കട്ടിയുള്ളതും ചുരുണ്ടതുമാവുന്നു

ചര്‍മ്മത്തിലുണ്ടാകുന്ന മാറ്റങ്ങള്‍ (Skin changes)
മുഖരോമങ്ങള്‍ (മീശയും താടിയും) പ്രത്യക്ഷമാവാന്‍ തുടങ്ങും.കക്ഷത്തിലെ രോമങ്ങള്‍ വളരാനാരംഭിക്കും,കൂടുതല്‍ വിയര്‍പ്പ് അനുഭവപ്പെടും
ചില ആണ്‍കുട്ടികളില്‍ മുഖക്കുരു ഉണ്ടായിത്തുടങ്ങും. സാധാരണയായി, വൈറ്റ് ഹെഡ്സ്, ബ്ലാക്ക് ഹെഡ്സ് അല്ലെങ്കില്‍ ചലം നിറഞ്ഞ പസ്തുലെറ്റ്സ്.
ശബ്ദത്തിലുണ്ടാവുന്ന മാറ്റം (Voice changes)
ശബ്ദത്തില്‍ ഇടര്‍ച്ചയുണ്ടാവുമെങ്കിലും പിന്നീടത് ഘനമുള്ളതാകും. ആദ്യഘട്ടത്തില്‍ ശബ്ദം നിയന്ത്രിക്കാന്‍ ബുദ്ധിമുട്ട് അനുഭവപ്പെട്ടേക്കും.

ഉദ്ധാരണവും സ്വപ്ന സ്ഖലനവും (Erections and wet dreams)
ടെസ്റ്റോസ്റ്റിറോണ്‍ ഹോര്‍മോണ്‍ മൂലം അപ്രതീക്ഷിതമായ സാഹചര്യങ്ങളില്‍ പോലും ആണ്‍കുട്ടികള്‍ക്ക് ഉദ്ധാരണം സംഭവിക്കുന്നു. ഉറക്കത്തില്‍ സ്ഖലനം സംഭവിക്കുകയും ചെയ്തേക്കാം (സ്വപ്ന സ്ഖലനം),മാനസികാവസ്ഥയില്‍ പെട്ടെന്നുണ്ടാവുന്ന മാറ്റങ്ങള്‍ (Mood changes),പ്രായപൂര്‍ത്തിയാവുന്ന സമയത്ത് ആണ്‍കുട്ടികളില്‍ മാനസികാവസ്ഥയില്‍ പെട്ടെന്നുള്ള മാറ്റവും കോപാവേശവും മറ്റും കാണാന്‍ സാധിക്കും. കാലക്രമേണ ഇതിന് മാറ്റം സംഭവിക്കും.
വേഗത്തിലുള്ള വളര്‍ച്ച (Growth spurt)
പ്രായപൂര്‍ത്തിയാവുന്ന കാലയളവില്‍ ആണ്‍കുട്ടികളുടെ വളര്‍ച്ചയില്‍ പെട്ടെന്നൊരു കുതിച്ചുചാട്ടം കാണാന്‍ കഴിയും. ശരീരം വലിപ്പം വയ്ക്കുകയും കൂടുതല്‍ മസിലുകള്‍ ദൃശ്യമാവുകയും ചെയ്യും.

പ്രായപൂര്‍ത്തിയാവുമ്ബോള്‍ പെണ്‍കുട്ടികളില്‍ ഉണ്ടാകുന്ന മാറ്റങ്ങള്‍ (PUBERTAL CHANGES IN GIRLS )

മാറിടത്തില്‍ വരുന്ന മാറ്റങ്ങള്‍ (Breast changes)
മാറിടത്തിന്റെ വളര്‍ച്ചയാണ് പ്രായപൂര്‍ത്തിയാവുന്ന പെണ്‍കുട്ടികളില്‍ വരുന്ന ആദ്യമാറ്റം.ചിലയവസരങ്ങളില്‍, ഒരു മാറിടത്തിലോ അല്ലെങ്കില്‍ രണ്ടിലുമോ വേദന അനുഭവപ്പെട്ടേക്കാം.പതുക്കെ, രണ്ട് മാറിടങ്ങളും വലിപ്പം വയ്ക്കും.
ജനനേന്ദ്രിയങ്ങളില്‍ വരുന്ന മാറ്റങ്ങള്‍ (Genital changes)
പ്യൂബിക് രോമങ്ങള്‍ വളരാന്‍ തുടങ്ങും,ക്രമേണ, പ്യൂബിക് രോമങ്ങള്‍ കട്ടിയുള്ളതും ചുരുണ്ടതുമാവും.ചര്‍മ്മത്തിനു കട്ടി കൂടുന്നതിനാല്‍ പ്യൂബിക് പ്രദേശത്തിനു ചുറ്റുമുള്ള ഭാഗം ഇരുണ്ട നിറത്തിലാവുന്നു.ഈസ്ട്രജന്‍ ഹോര്‍മോണിന്റെ പ്രവര്‍ത്തനം മൂലവും യോനിയുടെ ഉള്ളിലെ പി എച്ച്‌ (pH) അസിഡിക് ആകുന്നതു മൂലവും യോനിയുടെ ഉള്‍വശത്തെ നിറം ചുവപ്പില്‍ നിന്ന് ഇളം പിങ്കാകുന്നു.ഈസ്ട്രജന്റെ സാന്നിധ്യം മൂലം യോനിയില്‍ നിന്ന് വെളുത്ത നിറത്തിലുള്ള സ്രവം ഉണ്ടാകാം.പ്രായപൂര്‍ത്തിയാകല്‍ തുടങ്ങി ഒന്നോ രണ്ടോ വര്‍ഷത്തിനു ശേഷം പെണ്‍കുട്ടികള്‍ക്ക് ആദ്യ ആര്‍ത്തവം ഉണ്ടാകും.

ചര്‍മ്മത്തില്‍ വരുന്ന വ്യത്യാസങ്ങള്‍ (Skin changes)
ചില പെണ്‍കുട്ടികളുടെ കൈയിലും കാലിലും ഈ സമയത്ത് രോമവളര്‍ച്ചയുണ്ടാവും, കക്ഷത്തില്‍ രോമവളര്‍ച്ച തുടങ്ങും,കൂടുതല്‍ വിയര്‍പ്പ് അനുഭവപ്പെടും.മിക്ക പെണ്‍കുട്ടികളിലും മുഖക്കുരു ഉണ്ടായിത്തുടങ്ങും. സാധാരണയായി, വൈറ്റ് ഹെഡ്സ്, ബ്ലാക്ക് ഹെഡ്സ് അല്ലെങ്കില്‍ ചലം നിറഞ്ഞ പസ്തുലെറ്റ്സ്.
വേഗത്തിലുള്ള വളര്‍ച്ച (Growth spurt)
പ്രായപൂര്‍ത്തിയാവുന്ന സമയത്ത് ശരീര വളര്‍ച്ച വളരെ വേഗത്തിലാകും
ഈ സമയത്ത്, മിക്ക പെണ്‍കുട്ടികളുടെയും ഭാരം വര്‍ധിക്കുകയും കൈയുടെ മുകള്‍ ഭാഗത്തും നിതംബത്തിലും മറ്റും കൊഴുപ്പ് അടിയുകയും ചെയ്യും
അരക്കെട്ടിനെ അപേക്ഷിച്ച്‌ ഇടുപ്പിനും വസ്തി പ്രദേശത്തിനും വിസ്തൃതി കൂടും.പ്രായപൂര്‍ത്തിയാവുന്ന ഘട്ടത്തിന്റെ അവസാനം പെണ്‍കുട്ടികളുടെ ശരീരഘടന മുതിര്‍ന്ന സ്ത്രീകളുടേതിന് സമാനമാവും.

ലൈംഗികാവയവങ്ങളെപ്പറ്റിയും ആര്‍ത്തവത്തെപ്പറ്റിയും പ്രത്യുല്‍പാദനത്തെപ്പറ്റിയും അമ്മയെ അമ്പരപ്പിക്കുന്ന അറിവുകള്‍ മകൾക്ക് ഉണ്ടാകാമെങ്കിലും അവള്‍ പഴയ കാലത്തെ കൗമാരപ്രായക്കാരില്‍ നിന്ന് പലകാര്യങ്ങളിലും പിറകിലായിരിക്കും. ഋതുമതിയായി ആദ്യത്തെ ഒരു വര്‍ഷം ഉണ്ടാകുന്ന പതിനഞ്ചു ശതമാനം ആര്‍ത്തവചക്രങ്ങളില്‍ മാത്രമേ അണ്ഡോ ല്‍പാദനം നടക്കുന്നുള്ളു. മാനസികമായി മാത്രമല്ല പ്രത്യുല്‍പാദനക്ഷമതയുടെ കാര്യത്തിലും പെണ്‍കുട്ടികള്‍ പതിനെട്ടു വയസ്സുവരെ അപക്വമതികള്‍ തന്നെ. ഇവിടെയും അമ്മ തന്നെ റോൾ മോഡലായി മകൾക്ക് വഴികാട്ടിയാകേണ്ടതാണ്‌