blogadmin

ആപ്പിൾ സൈഡർ വിനഗറിന്റെ ഔഷധഗുണങ്ങളെക്കുറിച്ച് ഒരുപാട് അനുഭവസാക്ഷ്യങ്ങൾ കേൾക്കുന്നുണ്ടെങ്കിലും അതിൽ ഈയിടെയായി പ്രചാരം ലഭിക്കുന്നത് ഇതു ശരീരഭാരം കുറയ്ക്കാൻ സഹായിക്കുമെന്നതാണ്. ഭക്ഷണത്തിനു മുൻപ് ഒന്നോ രണ്ടോ സ്പൂൺ എസിവി കഴിച്ചാൽ വിശപ്പു കുറയുമെന്നും വയർ നിറഞ്ഞതായി തോന്നുമെന്നുമായിരുന്നു കണ്ടത്. ആപ്പിൾ സൈഡർ വിനഗർ വെയ്റ്റ്ലോസ് ഡയറ്റ് അല്ലെങ്കിൽ ആപ്പിൾ സൈഡർ വിനഗർ ഡീടോക്സ് എന്നീ വാക്കുകൾ ഗൂഗിൾ തിരയലിൽ വ്യാപകമായി ഉപയോഗിക്കപ്പെട്ടു. എന്നാൽ, സത്യത്തിൽ ആപ്പിൾ സൈഡർ വിനഗറിന് ഭാരം കുറയ്ക്കാനുള്ള എന്തെങ്കിലും സവിശേഷ കഴിവുണ്ടോ?

അതറിയണമെങ്കിൽ ആപ്പിൾ സൈഡർ വിനഗർ എന്താണെന്ന് അറിയണം.

പുളിപ്പിച്ച ആപ്പിൾ ജ്യൂസിൽ നിന്നാണ് ആപ്പിൾ സൈഡർ വിനഗർ നിർമിക്കുന്നത്. ആദ്യം ആപ്പിൾ ചതച്ചെടുക്കുന്നു. ചതച്ചെടുത്ത നീരിലേക്ക് യീസ്റ്റ് ചേർക്കുന്നു. അതോടെ പഴസത്തിലെ പഞ്ചസാര പുളിപ്പിക്കലിനു വിധേയമായി ആൽക്കഹോളാകുന്നു. ഇതാണ് ആപ്പിൾ സൈഡർ. അടുത്തതായി ഇതിലേക്ക് ആസിഡ് ഫോമിങ് ബാക്ടീരിയ ചേർക്കുന്നു. ഇത് ആൽക്കഹോളിനെ അസറ്റിക് ആസി‍ഡ് ആക്കുന്നു. അങ്ങനെ ആപ്പിൾ സൈഡർ വിനഗർ രൂപപ്പെടുന്നു.

അസറ്റിക് ആസിഡ് ആണ് ആപ്പിൾ സൈഡർ വിനഗറിലെ പ്രധാനഘടകം. ആപ്പിൾ സൈഡർ വിനഗറിന് അതിന്റെ പ്രത്യേകഗന്ധവും ചവർപ്പുരുചിയും നൽകുന്നത് അസറ്റിക് ആസിഡാണ്. ആപ്പിൾ സൈഡർ വിനഗറിന്റെ ആരോഗ്യഗുണങ്ങൾക്കു പിന്നിലെ പ്രധാനഘടകവും ഇതുതന്നെയാണെന്നാണ് ഗവേഷണങ്ങൾ പറയുന്നത്.

നിങ്ങളുടെ അഭിപ്രായം / ചോദ്യം ഇവിടെ പണക്കുവയ്ക്കുക : https://wa.link/jo2ngq

ഭാരം കുറയ്ക്കുമോ?

ഭാരം കുറയ്ക്കാൻ ഒരു മാജിക്കും ഇല്ലെന്നും ആപ്പിൾ സൈഡർ വിനഗറിന് കൊഴുപ്പുരുക്കുന്നതിലൊന്നും പ്രത്യേകിച്ച് ഒരു റോളുമില്ലെന്നുമാണ് ചില ഗവേഷകർ പറയുന്നത്. പക്ഷേ, മൃഗങ്ങളിൽ നടത്തിയ ചില പരീക്ഷണഫലങ്ങൾ കാണിക്കുന്നത് എസിവി പലതരത്തിൽ ശരീരഭാരം കുറയ്ക്കാൻ സഹായിക്കുമെന്നാണ്.

∙ അമിതശരീരഭാരമുള്ള എലികളിൽ നടത്തിയ പഠനത്തിൽ അസറ്റിക് ആസിഡ് കൊഴുപ്പ് അടിയുന്നത് തടയുമെന്നും അവയുടെ ഉപാപചയപ്രക്രിയ മെച്ചപ്പെടുത്തുന്നതായും കണ്ടു. മനുഷ്യരിൽ നടത്തിയ പഠനത്തിലും ചില പൊസിറ്റീവ് പ്രതികരണങ്ങൾ ലഭിച്ചിട്ടുണ്ട്. 2009ൽ 175 പേരിൽ നടത്തിയ ട്രയലിൽ വിനഗർ മൂന്നുമാസം കഴിച്ചവരിൽ (ദിവസം ഒന്നോ രണ്ടോ ടേബിൾസ്പൂൺ) കഴിക്കാത്തവരെ അപേക്ഷിച്ച് മിതമായ ഭാരനഷ്ടം ഉണ്ടായതായും ട്രൈഗ്ലിസറൈഡ് നിരക്ക് കുറഞ്ഞതായും കണ്ടു. മറ്റൊരു ചെറിയ പഠനത്തിൽ വിനഗർ കഴിച്ചവരിൽ വേഗം വയർ നിറഞ്ഞതായി തോന്നിപ്പിച്ചുവെന്നും കണ്ടു.

പക്ഷേ, ഈ പഠനങ്ങളൊന്നും ആപ്പിൾ സൈഡർ വിനഗറിനെക്കുറിച്ചു പ്രത്യേകമായി നടത്തിയവയല്ല.

∙ മറ്റൊരു പഠനത്തിൽ കാലറി നിയന്ത്രിച്ച ഡയറ്റിങ്ങിലായിരുന്നവർക്ക് ആപ്പിൾ സൈഡർ വിനഗർ കൂടി നൽകി. 12 ആഴ്ചകൾക്കു ശേഷം പരിശോധിച്ചപ്പോൾ ആപ്പിൾ സൈഡർ വിനഗർ കൂടി കഴിച്ചവരിൽ അതെടുക്കാത്തവരെ അപേക്ഷിച്ച് കൂടുതൽ ഭാരനഷ്ടം ഉണ്ടായതായി കണ്ടു.

ചുരുക്കിപ്പറഞ്ഞാൽ ഭാരം കുറയ്ക്കുന്നതിന് ആപ്പിൾ സൈഡർ വിനഗറിന് എന്തെങ്കിലും പ്രത്യേക സിദ്ധിയുണ്ടെന്നു ഉറപ്പിച്ചുപറയാൻ ശാസ്ത്രീയമായ തെളിവുകൾ കുറവാണ്. പക്ഷേ, മിതമായ ഉപയോഗം കൊണ്ട് ഗുണമുണ്ടായെന്നു വരാം.

നിങ്ങളുടെ അഭിപ്രായം / ചോദ്യം ഇവിടെ പണക്കുവയ്ക്കുക : https://wa.link/jo2ngq

മറ്റു ഗുണങ്ങൾ

ആപ്പിൾ സൈഡർ വിനഗറിനു മറ്റു പല ആരോഗ്യഗുണങ്ങളും ഉണ്ടെന്ന് പഠനങ്ങൾ സാക്ഷ്യപ്പെടുത്തുന്നു.

∙ ആപ്പിൾ സൈഡർ വിനഗർ രക്തത്തിലെ പഞ്ചസാരയുടെ നിരക്ക് കുറയ്ക്കുന്നു. എലികളിൽ നടത്തിയ ഒരു പഠനത്തിൽ, ആപ്പിൾ സൈഡർ വിനഗർ കരളിന്റെയും പേശികളുടെയും ഗ്ലൂക്കോസ് ആഗിരണം മെച്ചപ്പെടുത്തുന്നതായി കണ്ടിരുന്നു. ഇതിലെ അസറ്റിക് ആസിഡ് കാർബോഹൈഡ്രേറ്റിന്റെ ദഹനത്തെയും ശരീരത്തിലേക്കുള്ള ഗ്ലൂക്കോസ് ആഗിരണത്തെയും നിയന്ത്രിക്കാൻ സഹായിക്കുന്നു.

∙ ഹൃദ്രോഗം തടയുന്നു. ചീത്ത കൊളസ്ട്രോൾ, ട്രൈഗ്ലിസറൈഡ്, വിഎൽഡിഎൽ എന്നിവ കുറയ്ക്കാൻ സഹായിക്കുന്നു.

നിങ്ങളുടെ അഭിപ്രായം / ചോദ്യം ഇവിടെ പണക്കുവയ്ക്കുക : https://wa.link/jo2ngq

ഉപയോഗിക്കുമ്പോൾ ശ്രദ്ധിക്കുക

ആപ്പിൾ സൈഡർ വിനഗർ വല്ലപ്പോഴുമൊക്കെ ഉപയോഗിക്കുന്നതുകൊണ്ട് ദോഷമൊന്നുമില്ല.

∙ പതിവായോ വർധിച്ച അളവിലോ ഉപയോഗിക്കുന്നത് ഒഴിവാക്കുക. അമ്ലസ്വഭാവമുള്ളതായതിനാൽ തൊണ്ടയിലും മറ്റും പ്രശ്നങ്ങൾ വരുത്താം.

നേർപ്പിച്ചു കഴിക്കുന്നതാണ് ഉത്തമം. ഇല്ലെങ്കിൽ പല്ലിന്റെ ഇനാമലിനു നാശം വരാം. ഒന്നോ രണ്ടോ ടേബിൾ സ്പൂൺ എസിവി എടുത്ത് ഒരു ഗ്ലാസ്സ് വെള്ളത്തിൽ നേർപ്പിച്ചു കഴിക്കുന്നതാണ് ഉത്തമം.

∙ എസിവി ശരീരത്തിലെ പൊട്ടാസ്യം നിരക്കു കുറയ്ക്കുമെന്നു പഠനങ്ങളിൽ തെളിഞ്ഞിട്ടുണ്ട്. അതുകൊണ്ട് ബിപി മരുന്നു കഴിക്കുന്നവർ ശ്രദ്ധിച്ച് ഉപയോഗിക്കുക.

∙ ഇൻസുലിൻ നിരക്കിനെയും വിനഗർ സ്വാധീനിക്കുന്നുണ്ട്. അതുകൊണ്ട് പ്രമേഹത്തിനു മരുന്നു കഴിക്കുന്നവരും വളരെ ശ്രദ്ധിച്ചുമാത്രം ഉപയോഗിക്കുക

∙ വൃക്കരോഗമുള്ളവരുടെ വൃക്കയ്ക്ക് ഈ ആസിഡിനെ സംസ്കരിക്കാൻ കഴിയണമെന്നില്ല. സൂക്ഷിച്ച് ഉപയോഗിക്കുക.

ആപ്പിൾ സൈഡർ വിനഗർ ഭാരം കുറയ്ക്കാനുള്ള മാജിക് സപ്ലിമെന്റല്ല. കൊഴുപ്പും കാലറിയും കുറഞ്ഞ ഡയറ്റിനോ വ്യായാമത്തിനോ പകരമല്ല എസിവി. അവയ്ക്കൊപ്പം ഉപയോഗിക്കുമ്പോൾ കുറച്ചു പ്രയോജനം ലഭിച്ചേക്കാമെന്നു മാത്രം.

നിങ്ങളുടെ അഭിപ്രായം / ചോദ്യം ഇവിടെ പണക്കുവയ്ക്കുക : https://wa.link/jo2ngq

വിവരങ്ങൾക്ക് കടപ്പാട്: മനോരമ ആരോഗ്യം ആർകൈവ്

പ്രസവം കഴിഞ്ഞു വർഷങ്ങളായിട്ടും വയറിലെ സ്ട്രെച്ച് മാർക്ക് മായുന്നില്ല. സാരിയുടുക്കുമ്പോൾ അതൊരു അഭംഗിയാണ്. എന്താണ് പരിഹാരം?

പൂച്ച മാന്തിയതുപോലെയുള്ള വെള്ളപ്പാടുകൾ, തവിട്ടുവരകൾ….പ്രസവം കഴിഞ്ഞ് വയർ പൂർവസ്ഥിതിയിലെത്തിയാലും വയറിലെ ഈ പാടുകൾ മാറുകയില്ല. സ്ട്രെച്ച് മാർക്ക് എന്ന ഒാമനപ്പേരിൽ അറിയപ്പെടുന്ന ഈ പാടുകൾ സൗന്ദര്യകാര്യത്തിൽ ശ്രദ്ധാലുക്കളായവർക്ക് വളരെയധികം മനോവിഷമം ഉണ്ടാക്കുന്ന ഒന്നാണ്.

പ്രസവം മൂലം മാത്രമല്ല

യഥാർഥത്തിൽ പ്രസവത്തെ തുടർന്നു മാത്രമല്ല സ്ട്രെച്ച് മാർക്ക് ഉണ്ടാകുന്നത്. ശരീരഭാരം വർധിക്കുമ്പോൾ ചർമം വലിയുന്നതിന്റെ ഭാഗമായി തുടയിലും കാലിലുമെല്ലാം കൗമാരപ്രായത്തിൽ പോലും ഇത്തരം പാടുകൾ വീഴാം. കൗമാരപ്രായത്തിലെ പൊടുന്നനെയുള്ള ശരീരവളർച്ച, ഗർഭധാരണം, പെട്ടെന്നു ശരീരഭാരം കുറയുകയോ കൂടുകയോ ചെയ്യുക എന്നീ ഘട്ടങ്ങളിലാണ് പൊതുവേ സ്ട്രെച്ച് മാർക്കുകൾ ചർമത്തിൽ ഉണ്ടാവുന്നത്. പുരുഷന്മാരിലും വണ്ണം വയ്ക്കുന്നതിന്റെ ഭാഗമായി പുറത്തും കൈകളിലും വയറിലുമൊക്കെ പാടുകൾ വീഴാം. കോർട്ടിക്കോസ്റ്റിറോയ്ഡ് ക്രീമുകളും ലോഷനുകളും സ്ഥിരമായി ഉപയോഗിക്കുന്നവരിലും പാടുകൾ വീഴാം.

നമ്മുടെ ചർമം പൊടുന്നനെ ഒരുപാട് വലിയുകയോ ചുരുങ്ങുമ്പോഴോ ഒക്കെ ചെയ്യുമ്പോൾ നമ്മുടെ ചർമത്തിനടിയിലുള്ള കൊളാജൻ എന്ന ഇലാസ്റ്റിക് ഫൈബർ പൊട്ടുന്നതാണ് സ്ട്രെച്ച് മാർക്കുകൾ രൂപപ്പെടാൻ കാരണം.

ഒാരോരുത്തരുടെയും ചർമത്തിന്റെ നിറമനുസരിച്ച് ഇരുണ്ട തവിട്ടുനിറത്തിലും ഇളം റോസ്നിറത്തിലും ചുവപ്പു കലർന്ന തവിട്ടുനിറത്തിലും വിളറിയ വെള്ളനിറത്തിലുമെല്ലാം പാടുകൾ ഉണ്ടാകാം. തുടക്കത്തിൽ ഇതൽപം തടിച്ചുനിൽക്കുന്നതുപോലെയുണ്ടാകും. കാലക്രമേണ തടിപ്പു കുറയും, പാടിന്റെ നിറം മങ്ങും, പക്ഷേ, പൂർണമായി മാഞ്ഞുപോവുകയില്ല.

എന്തുകൊണ്ട് ചിലർക്കു മാത്രം?

എന്തുകൊണ്ടാണ് ഗർഭിണികളാകുന്നതോ വണ്ണം വയ്ക്കുന്നതോ ആയ എല്ലാവർക്കും സ്ട്രെച്ച് മാർക് വരാത്തതെന്ന ചോദ്യം പ്രസക്തമാണ്. പക്ഷേ, കൃത്യമായ ഉത്തരം പറയുക പ്രയാസമാണ്. അമ്മയ്ക്കോ അടുത്ത ബന്ധുക്കൾക്കോ സ്ട്രെച്ച് മാർക് ഉണ്ടായിരുന്നുവെങ്കിൽ നിങ്ങൾക്കും വരാൻ സാധ്യതയേറെയാണ്. ഹോർമോണുകളുടെ നിരക്കിലെ വ്യതിയാനങ്ങളും സ്ട്രെച്ച് മാർക്കുകളുടെ രൂപപ്പെടലിൽ ഒരു പങ്കുവഹിക്കുന്നതായി കാണുന്നതായി വിദഗ്ധർ പറയുന്നു.

നിങ്ങളുടെ അഭിപ്രായം / ചോദ്യം ഇവിടെ പണക്കുവയ്ക്കുക : https://wa.link/jo2ngq

എന്താണ് പരിഹാരം?

ക്രീമുകളും ലോഷനുകളും എണ്ണകളുമെന്നു വേണ്ട കൊക്കോ ബട്ടർ, വൈറ്റമിൻ ഇ എന്നിങ്ങനെ വിപണിയിൽ സ്ട്രെച്ച് മാർക്ക് മായ്ക്കാമെന്നവകാശപ്പെട്ട് ഒട്ടേറെ ഉൽപന്നങ്ങൾ എത്തുന്നുണ്ട്. പക്ഷേ, പുറമേ പുരട്ടുന്ന ക്രീമുകൾ പലതും യാതൊരു പ്രയോജനവും ചെയ്യില്ല എന്നാണ് ഇതു സംബന്ധിച്ചു നടന്ന ചില പഠനങ്ങൾ സൂചിപ്പിക്കുന്നത്.

∙ ക്രീമോ ലോഷനോ പരീക്ഷിക്കുന്നുവെങ്കിൽ തന്നെ വർഷങ്ങൾ കഴിഞ്ഞിട്ട് ചെയ്യുന്നതിലും പ്രയോജനപ്രദം പാടുകൾ രൂപപ്പെട്ട് അധികം വൈകാതെ ചെയ്യുന്നതാണ്.

∙ മസാജ് കുറെച്ചൊക്കെ സ്ട്രെച്ച് മാർക്കുകൾ മങ്ങാൻ സഹായിക്കുമെന്ന് അഭിപ്രായമുണ്ട്. സാവധാനം ക്രീമോ ലോഷനോ എണ്ണയോ പുരട്ടി വയറ് മസാജ് ചെയ്യുക. പക്ഷേ, ഒന്നോർക്കുക, ആഴ്ചകൾ എടുക്കും ചെറിയ മാറ്റമെങ്കിലും പ്രത്യക്ഷമാകാൻ.

∙ ഹയലൂറോണിക് ആസിഡ്, ട്രെറ്റിനോയിൻ എന്നീ ഘടകങ്ങൾ അടങ്ങിയ ക്രീമുകൾ പുരട്ടിയാൽ സ്ട്രെച്ച് മാർക്കിന്റെ നിറം മങ്ങിയതാക്കാൻ സാധിക്കുമെന്നു പറയുന്നു. പക്ഷേ, പൂർണമായി പാട് മായ്ക്കാനാകില്ല.

∙ ഗർഭകാലത്ത് ക്രീമും ലോഷനുമൊക്കെ വയറിൽ പുരട്ടും മുൻപ് ഗൈനക്കോളജിസ്റ്റിനോട് അഭിപ്രായം ചോദിക്കുക. ഇത്തരം ക്രീമുകളിലെ റെറ്റിനോൾ പോലുള്ള ചില ഘടകങ്ങൾ ഗർഭസ്ഥശിശുവിനു ദോഷകരമായേക്കാമെന്നു പഠനങ്ങളുണ്ട്.

കോസ്മറ്റിക് ട്രീറ്റ്മെന്റ്

മൈക്രോനീഡിലിങ്, ലേസർ ചികിത്സ എന്നിവ സ്ട്രെച്ച് മാർക്കുകൾ മായ്ക്കാനായി ചർമരോഗവിദഗ്ധർ ഉപയോഗിക്കാറുണ്ട്. ഒന്നിലധികം തവണകൾ ചെയ്യേണ്ടിവരും. മൈക്രോനീഡിലിങ്ങും റേഡിയോഫ്രീക്വൻസിയും സംയോജിതമായി ചെയ്യുന്നത് പാട് മായ്ക്കാൻ കുറേക്കൂടി ഫലപ്രദവും സുരക്ഷിതവുമാണെന്നു വിദഗ്ധർ പറയുന്നു. കൗമാരപ്രായത്തിൽ വരുന്ന സ്ട്രെച്ച് മാർക്കുകൾ മായ്ക്കാനും ഇവ സുരക്ഷിതമാണ്. ഒന്നിലധികം സിറ്റിങ് വേണ്ടിവരും, ചെലവ് അൽപം കൂടുതലായിരിക്കും. ഈ ചികിത്സകളോടൊപ്പം ശരീരഭാരം കുറയ്ക്കുകയും ശരീരം ടോൺ ചെയ്യുകയും കൂടി ചെയ്താൽ കൂടുതൽ മികച്ച ഫലം ലഭിക്കും.

നിങ്ങളുടെ അഭിപ്രായം / ചോദ്യം ഇവിടെ പണക്കുവയ്ക്കുക : https://wa.link/jo2ngq

വീട്ടുപരിഹാരങ്ങൾ

∙ ഗർഭകാലത്തെ സ്ട്രെച്ച് മാർക്കുകളുടെ കടുപ്പം കുറയ്ക്കാൻ വയർ വലുതായിത്തുടങ്ങുമ്പോഴേ ഒലീവ് എണ്ണ ഉപയോഗിച്ച് മൃദുവായി മസാജ് ചെയ്യുക. പ്രസവശേഷവും ഇതു തുടരാം.

∙ പ്രസവശേഷം വയർ കുറയുന്ന സമയത്ത് മുട്ടവെള്ള വയറിനു മുകളിൽ പുരട്ടുന്നത് ഉദരചർമം തൂങ്ങുന്നതു കുറച്ചേക്കാം.

∙ അലോവെര ജെൽ ഉപയോഗിച്ച് ചർമം മസാജ് ചെയ്ത് 30 മിനിറ്റുനേരം വയ്ക്കുന്നത് പാടുകൾ കുറേയൊക്കെ മങ്ങാൻ ഇടയാക്കാം.

∙ വിർജിൻ കോക്കനട്ട് ഒായിലും ഒലീവ് ഒായിലും ചേർത്ത് മസാജ് ചെയ്യാം.

∙ ഉരുളക്കിഴങ്ങ് നീര് ദിവസവും പുരട്ടുന്നത് പാടുകളുടെ കറുപ്പ് കുറയ്ക്കും.

∙ ഉദരഭാഗത്തെ ചർമം ഇടയ്ക്ക് സ്ക്രബ് ചെയ്യുന്നതു വഴി മൃതകോശങ്ങൾ നീങ്ങാനും അതുവഴി സ്ട്രെച്ച് മാർക്ക് മങ്ങാനും ഇടയാക്കിയേക്കാം.

ഏതു പരിഹാരമായാലും ആഴ്ചകളോളം പതിവായി ചെയ്താലേ ചെറിയ മാറ്റമെങ്കിലും ഉണ്ടാകൂ.

വിവരങ്ങൾക്ക് കടപ്പാട്

ഡോ. ലക്ഷ്മി അമ്മാൾ

ഗൈനക്കോളജിസ്റ്റ്

എസ് യു റ്റി ഹോസ്പിറ്റൽ

തിരുവനന്തപുരം

ഡോ. നന്ദിനി നായർ

ഡെർമറ്റോളജിസ്റ്റ്

ക്യൂട്ടിസ് സ്കിൻ ക്ലിനിക്

എറണാകുളം

അനില ശ്രീകുമാർ

തിരുവനന്തപുരം