ചോദ്യങ്ങൾ

ഭൂരിഭാഗം സ്‌ത്രീകളിലേയും ലൈംഗിക മരവിപ്പ് തികച്ചും മാനസികതലത്തിൽ ഉള്ളതാണ്. ഭൂതകാലജീവിതത്തിലെ അനുഭവങ്ങളുമായാണ് അവയ്‌ക്ക് ബന്ധം. പക്ഷേ നിർഭാഗ്യകരമെന്നു പറയട്ടെ, ആ വസ്‌തുത മറച്ചുവച്ചുകൊണ്ട് അനാവശ്യമായ സ്‌കാനിംഗുകളും തീവ്രമായ പാർശ്വഫലങ്ങളുള്ള മരുന്നുകളും നൽകി രോഗിയുടെ ശാരീരിക ആകൃതി തന്നെ വികൃതമാക്കുന്ന ഹോർമോൺ ചികിത്സയിലാണ് മിക്ക ഡോക്‌ടർമാർക്കും താൽപര്യം. അതിനു പിന്നിലെ സാമ്പത്തിക ലക്ഷ്യങ്ങൾ പലപ്പോഴും നമ്മൾ തിരിച്ചറിയാതെ പോകുന്നുണ്ട്.

വളരെ ചെറുപ്പത്തിൽ സംഭവിച്ചുപോകുന്ന ലൈംഗിക ഉത്തേജക അനുഭവങ്ങൾ മനപ്പൂർവ്വമല്ലാത്ത അവസ്‌ഥയിൽ ചിലരിലെങ്കിലും രതിമൂർച്‌ഛ (Orgasm) ഉളവാക്കാറുണ്ട്.

അസ്വീകാര്യമായ ഇത്തരം രതിമൂർച്‌ഛകൾ പക്വതയെത്താത്ത ഇളംപ്രായക്കാരുടെ ഉപബോധമനസ്സിൽ ലൈംഗികതയോടു തന്നെ വല്ലാത്ത ഒരുതരം വിരക്‌തി സൃഷ്‌ടിക്കും. പിന്നീട് പ്രായപൂർത്തിയെത്തുമ്പോൾ ഈ വിഭാഗത്തിൽപ്പെട്ട സ്‌ത്രീകളിൽ അത് ലൈംഗിക മരവിപ്പായി മാറും.

ലൈംഗിക തൃഷ്‌ണയെ ത്വരിതപ്പെടുത്തുകയും ശക്‌തമാക്കുകയും ചെയ്യുന്നതിൽ നാം ഭക്ഷിക്കുന്ന ആഹാരത്തിന് ഒരു വലിയ പങ്കുണ്ട്. പ്രോട്ടീനുകളും വൈറ്റമിനുകളും കൊഴുപ്പുമൊക്കെ അടങ്ങിയ വിവിധ ഭക്ഷണപദാർത്ഥങ്ങൾ നാം കഴിയ്‌ക്കേണ്ടത് ഇക്കാര്യത്തിൽ ആവശ്യമാണ്.

പാലും പാലുൽപ്പന്നങ്ങളും കൂടാതെ മുട്ട, ഇറച്ചി, കരൾ, ചീസ് എന്നിവയും എല്ലാവർക്കും നിയന്ത്രിതമായ രീതിയിൽ ഉപയോഗിക്കാവുന്നവയാണ്.

വൈറ്റമിൻ C കൊണ്ട് സമ്പുഷ്‌ടമായ നാരങ്ങയും നെല്ലിക്കയും പേരയ്‌ക്കയും തക്കാളിയും മുന്തിരിയും ഓറഞ്ചുമൊക്കെ ലൈംഗികശേഷിയെ വളരെയധികം വർദ്ധിപ്പിക്കുന്നുണ്ട്.

സജീവമായ ബീജാണുക്കളുടെ എണ്ണം കുറഞ്ഞവർക്ക് നൽകുന്ന ആയുർവേദ മരുന്നുകളിലെ പ്രധാന ഘടകം ഉയർന്ന നിലയിലുള്ള പ്രോട്ടീനുകൾ അടങ്ങിയ നായ്‌ക്കരുണപ്പരിപ്പാണ്. ഏതാണ്ട് ഇതിനോട് കിടപിടിയ്‌ക്കുന്ന ഒന്നാണ് സോയാബീൻ. മാത്രമല്ല വൈറ്റമിൻ B1, B9, K, തുടങ്ങിയവയൊക്കെ ദഹനത്തിന് അനുയോജ്യമായ രീതിയിൽ ഇവയിൽ സമ്മേളിച്ചിരിയ്‌ക്കുന്നുമുണ്ട്.

എണ്ണയിൽ വറുത്തതും പൊരിച്ചതുമായ ആഹാരപദാർത്ഥങ്ങൾ കഴിവതും ഒഴിവാക്കുന്നത് ആരോഗ്യകരമായ ശാരീരികസ്‌ഥിതിയ്‌ക്കും ലൈംഗികതയുടെ പ്രസരിപ്പിനും വളരെയധികം സഹായകരമായിരിക്കും.

മാനസികപിരിമുറുക്ക (Stress) ത്തിന് ഏറ്റവും ലളിതമായ പ്രായോഗിക അർത്ഥം അടിച്ചമർത്തപ്പെട്ട കോപം എന്നാണ്. തലച്ചോറിലെ ഒക്‌സിപിറ്റൽ ലോബി (occipital lobe) ൽ നോർഎപിനർഫിൻ (norepinephrine) എന്ന മസ്‌തിഷ്‌കരാസവസ്‌തുവിൽ ഈ ഘട്ടത്തിൽ ചില വ്യതിയാനങ്ങൾ സംഭവിയ്‌ക്കാറുണ്ട്. ലൈംഗിക സ്രവങ്ങളുടെ ഘടനയെയും ഇത് പരോക്ഷമായി ബാധിയ്‌ക്കുന്നുണ്ട്.

തന്നിമിത്തം ഒരു കുട്ടി വേണം എന്നുള്ള ആഗ്രഹത്തോടെയുള്ള ബന്ധപ്പെടലുകൾ ഇത്തരം കോപാകുലമായ സമയങ്ങളിൽ ഒഴിവാക്കുന്നതാണ് ഉചിതം. നശീകരണപ്രവണതയുള്ള കുട്ടികൾ ജനിക്കുന്നതിനും ഓട്ടിസം (autism) പോലെയുള്ള പ്രശ്നങ്ങളുള്ള കുഞ്ഞുങ്ങളുണ്ടാവുന്നതിനും അടിച്ചമർത്തിയ കോപത്തോടെയുള്ള സംഭോഗം കാരണമാകുന്നുവെന്ന് ആധുനിക മന:ശാസ്‌ത്രഗവേഷണങ്ങൾ വെളിപ്പെടുത്തുന്നു.

ലൈംഗികതയെക്കുറിച്ച് ശാരീരികം എന്നതിനപ്പുറം മന:ശാസ്‌ത്രതലത്തിൽ അപഗ്രഥിക്കുമ്പോൾ മാനസിക പിരിമുറുക്ക വേളകളിൽ ഗർഭധാരണത്തിനായുള്ള ബന്ധപ്പെടലുകൾ ഒഴിവാക്കുന്നതാണ് ഉചിതം. ഗർഭധാരണ സാദ്ധ്യതയില്ലാത്ത ദിവസങ്ങളിൽ ബന്ധപ്പെടുന്നതിൽ വിമുഖത കാട്ടേണ്ടതുമില്ല.

ഗർഭം ധരിക്കുക എന്നത് തികച്ചും ശാരീരികമായ ഒരു പ്രവർത്തനമാണ്. ആദ്യത്തെയോ രണ്ടാമത്തെയോ ബന്ധപ്പെടൽ എന്നതിലുപരി സജീവമായ ബീജാണുക്കൾ വേണ്ടതോതിലുള്ള പുരുഷനും കൃത്യമായ അണ്ഡോൽപാദനം നടക്കുന്ന സ്‌ത്രീയും തമ്മിലുള്ള വേഴ്‌ച അനുയോജ്യമായ ദിവസങ്ങളിൽ ആയിരുന്നുവോ എന്നതാണ് പ്രധാനം.

ക്രമമായ ആർത്തവചക്രമുള്ള സ്‌ത്രീകൾക്ക് ആർത്തവത്തിന് തൊട്ടുമുമ്പുള്ള ഒരാഴ്‌ചയും അതിനുശേഷമുള്ള ഒരാഴ്‌ചയും ഗർഭധാരണത്തിനു സാദ്ധ്യത വളരെ കുറവാണ്.

ആദ്യത്തെ ബന്ധപ്പെടൽ അണ്ഡവിസർജ്‌ജന (Ovulation) സമയത്തോ അതിനോട് തൊട്ടടുത്ത ദിവസങ്ങളിലോ ആവുമ്പോൾ മാത്രമേ ഗർഭധാരണത്തിന് സാദ്ധ്യതയുള്ളൂ എന്നോർക്കുക.

കന്യക എന്ന വാക്കിനർത്ഥം ശാരീരിക വേഴ്‌ചയിൽ ഏർപ്പെടാത്തവൾ എന്നാണ്. ഇതിന്‍റെ തെളിവായി പരിഗണിയ്‌ക്കപ്പെടുന്നത് ക്ഷതം പറ്റാത്ത കന്യാചർമ്മമാണ്.

പക്ഷേ ഇത് എല്ലായ്‌പ്പോഴും ശരിയാകണമെന്നില്ല. സംഭോഗത്തിലേർപ്പെട്ടിട്ടുള്ള ഒരു പെൺകുട്ടിയുടെ കന്യാചർമ്മത്തിന് ചില പ്രത്യേക സാഹചര്യങ്ങളിൽ യാതൊരു ക്ഷതവുമുണ്ടാകാതിരിയ്‌ക്കാം.

അതുപോലെ തന്നെ കന്യാചർമ്മം പൊട്ടിയിട്ടുള്ള യുവതി ഒരു തവണപോലും സെക്‌സിൽ ഏർപ്പെട്ടിട്ടുണ്ടാവണമെന്നുമില്ല. വ്യായാമങ്ങളിൽ മുഴുകുമ്പോഴോ, നീന്തൽ തുടങ്ങിയ ശാരീരികചലനങ്ങൾ ഏറെ ആവശ്യമുള്ള എക്‌സർസൈസുകൾ ചെയ്യുമ്പോഴോ കന്യാചർമ്മം പൊട്ടുന്നത് സാധാരണയാണ്. പതിവായി സൈക്കിൾ ചവിട്ടുന്ന പെൺകുട്ടികളിലും ഇത് സംഭവിക്കാറുണ്ട്.

ഗർഭനിരോധന മാർഗ്ഗങ്ങൾ (contraceptive methods) രണ്ടുതരമുണ്ട്. താൽക്കാലികവും സ്‌ഥിരവും. അവയിൽ സ്‌ഥിരമായ മാർഗ്ഗങ്ങൾ അവലംബിക്കുന്നവരിൽ ലൈംഗിക ത്വര കുറവായിരിക്കുമെന്ന തെറ്റിദ്ധാരണയുണ്ട്. യാതൊരു ശാസ്‌ത്രീയ അടിത്തറയുമില്ലാത്ത മിഥ്യാബോധം മാത്രമാണിത്.

അണ്ഡവാഹിനിക്കുഴൽ മുറിച്ചോ അവിടെ ക്ലിപ്പ്‌ പോലെയുള്ള ലഘുവായ ചില ഉപകരണങ്ങൾ നിക്ഷേപിച്ചോ ആണ് സ്‌ഥിരമായ ഗർഭനിരോധനം സാദ്ധ്യമാക്കുന്നത്. ഇവയ്‌ക്ക് വിധേയപ്പെടുന്നവർക്കാകട്ടെ യാതൊരുവിധ ബുദ്ധിമുട്ടുകളും അനുഭവപ്പെടുന്നുമില്ല.

ഈ പ്രക്രിയയോട് അനുബന്ധിച്ച് ഹോർമോൺ വ്യതിയാനങ്ങളും തീരെ സംഭവിക്കുന്നില്ല. അതുകൊണ്ട് തന്നെ പ്രസവം നിർത്തൽ ലൈംഗിക ജീവിതത്തെ ഒരുതരത്തിലും ബാധിക്കുന്നില്ല.

പ്രത്യുൽപാദനക്ഷമമായ അണ്ഡവികസനവും അനുബന്ധപ്രക്രിയകളും ഒരു സ്‌ത്രീയിൽ നടന്നുകൊണ്ടിരിക്കുന്നു എന്നതിന്‍റെ തെളിവാണല്ലോ കൃത്യമായ ആർത്തവം. ഗർഭപാത്രത്തിലെ പലതരം ദ്രവങ്ങൾ, ഗർഭാശയ പാളിയുടെ ഭാഗങ്ങൾ, ഇവിടുത്തെ കോശങ്ങളിൽ നിന്നുള്ള രക്‌തം എന്നിവയെല്ലാമാണ് ആർത്തവ സമയത്ത് പുറത്തുപോകുന്നത്. ഈ സമയത്തുണ്ടാകുന്ന മനംപിരട്ടൽ, പുറംവേദന, സ്‌തനങ്ങളുടെ മൃദുത്വം എന്നിവയെല്ലാം സ്‌ത്രീകളെ അസ്വസ്‌ഥരാക്കാറുണ്ട്. യോനീഭാഗത്തെ അസ്വാരസ്യങ്ങളും ഈ സമയത്ത് സാധാരണയാണ്.

വളരെ ചുരുക്കം സ്‌ത്രീകൾക്ക് ആർത്തവ സമയത്ത് ലൈംഗിക തൃഷ്ണ വർദ്ധിക്കാറുണ്ട്. പക്ഷേ ഗർഭധാരണമെന്നത് അണ്ഡവിസർജ്‌ജനത്തിന്‍റെ ദിവസങ്ങളുമായി ബന്ധപ്പെട്ടിട്ടുള്ളതാണ്. 28 ദിവസത്തെ കൃത്യമായ ആർത്തവക്രമമുള്ളവരിൽ 14-ാം ദിവസത്തോട് അനുബന്ധിച്ചാണ് ഇത് സംഭവിയ്‌ക്കുന്നത്, ആർത്തവ ദിനങ്ങളിലല്ല. അതുകൊണ്ട് തന്നെ ആർത്തവ ദിവസങ്ങളിൽ ഗർഭധാരണത്തിന് തീരെ സാധ്യതയില്ല.

“ഹലോ, നമിതയല്ലേ?”

“ഹായ്… രേഷ്‌മാ എന്‍റെ കല്ല്യാണക്കത്തു കിട്ടിയില്ലേ?”

“കിട്ടി… കിട്ടി… ഒരുക്കങ്ങളൊക്കെ എവിടെ വരെയായി? ഇപ്പോഴും സമോസ, ബർഗർ തീറ്റ തന്നെയാണാ? വറപൊരിയും ജങ്ക് ഫുഡുമൊന്നും ഇനി വേണ്ട. ഡയറ്റൊക്കെ ശ്രദ്ധിക്കുന്നില്ലേ? പിന്നെ ബ്യൂട്ടി ട്രീറ്റ്‌മെന്‍റുമൊക്കെ ഇപ്പോഴേ തുടങ്ങിക്കോ…”

“ആ വക കാര്യങ്ങളൊക്കെ അറിയാൻ കൂടിയാണ് ഞാൻ വിളിച്ചത് ചങ്ങാതീ…”

“നീ ടെൻഷനിടിക്കാതെ… അതെല്ലാം പറഞ്ഞു തരാം”

പ്രതിശ്രുത വധുവിനുള്ള ഫിറ്റ്‌നസ്സ് ടിപ്‌സ്…

ഡയറ്റ്

ശരീരം ഫിറ്റ് & ഫൈൻ ആകുന്നതിനു ഭക്ഷണത്തിൽ ചില ചിട്ടകൾ വരുത്താം…

• പ്രഭാത ഭക്ഷണം ഒരു കാരണവശാലും ഒഴിവാക്കരുത്. പ്രാതലിന് ഒരു മുട്ട, ബ്രഡ്, ഫ്രഷ് ജ്യൂസ് ഉൾപ്പെടുത്താം. മാത്രമല്ല ബദാം, വാൾനട്ട് തുടങ്ങിയ ഡ്രൈ ഫ്രൂട്ട്‌സും ഭക്ഷണത്തിന്‍റെ ഭാഗമാക്കുക. ഇവയിലടങ്ങിയ പ്രോട്ടീൻ, ഫൈബർ, ഫൈറോ കെമിക്കൽസ് ഹൃദയാരോഗ്യം കാക്കുന്നതിനും ശരീരഭാരം നിയന്ത്രിച്ചു നിർത്തുന്നതിനും സഹായകരമാകും.
• ദിവസവും ഭക്ഷണത്തിൽ ഒരു നേരം തൈര് ഉൾപ്പെടുത്തുക. തൈരിൽ അടങ്ങിയ സിങ്ക്, കാത്സ്യം, വിറ്റാമിൻ ബി എന്നിവ ചർമ്മത്തിന് മൃദുത്വം പകരും.
• ഇടനേരങ്ങളിൽ സ്‌നാക്‌സിനു പകരം പഴങ്ങൾ മതി.
• പനീർ കൊണ്ടുള്ള വിഭവങ്ങൾ ഭക്ഷണത്തിൽ ഉൾപ്പെടുത്തുന്നതും ഗുണം ചെയ്യും. പ്രോട്ടീൻ, കാത്സ്യം സമ്പുഷ്‌ടമായ പനീർ ഉദര സംബന്ധമായ രോഗങ്ങളെ അകറ്റി നിർത്തുമെന്നു മാത്രമല്ല പല്ലുകൾക്ക് ബലവും നൽകും.
• നോൺവെജാണോ? എങ്കിൽ ചെറുമീനുകൾ ഭക്ഷണത്തിന്‍റെ ഭാഗമാക്കുക. ഇതിലടങ്ങിയ പ്രോട്ടീൻസ് മുടിയുടെ വളർച്ച ത്വരിതപ്പെടുത്തുമെന്നു മാത്രമല്ല മുടിയ്‌ക്ക് തിളക്കവും നൽകും.
• ഇലക്കറികൾ പല നിറത്തിലുള്ള പച്ചക്കറികൾ തുടങ്ങിയവ ഭക്ഷണത്തിൽ ഉൾപ്പെടുത്തണം. പച്ചക്കറികൾ വേവിച്ചു കഴിക്കുക. ആരോഗ്യം മെച്ചപ്പെടുത്തുമെന്നു മാത്രമല്ല മുഖക്കുരു ശല്ല്യം ഇല്ലാതാക്കും. പോഷണം നിറഞ്ഞ കൊഴുപ്പു കുറഞ്ഞ ഭക്ഷണം കഴിക്കുക.

ബ്യൂട്ടി

സുന്ദരിയാവാൻ നേരത്തെ തന്നെ ഒരുക്കങ്ങൾ തുടങ്ങണം.

• പതിവായി മുഖത്ത് സിടിഎം അതായത് ക്ലെൻസിംഗ്, ടോണിംഗ്, മോയ്‌സ്‌ചറൈസർ ചെയ്യുക. മൃതകോശങ്ങൾ നീങ്ങി ചർമ്മം സുന്ദരമാകും.
• വരണ്ട് നിർജ്‌ജീവമായി തോന്നിക്കുന്ന മുടിയാണോ? എങ്കിൽ നാല് മാസം മുമ്പ് തന്നെ കേശപരിചരണം തുടങ്ങണം. ഡീപ്പ് കണ്ടീഷനിംഗ് ചെയ്യുന്നത് മുടിയുടെ സൗന്ദര്യത്തിനും കരുത്തിനും നല്ലതാണ്. മുടിയുടെ അറ്റം പിളരൽ, താരൻ പോലുള്ള പ്രശ്നങ്ങൾക്ക് ഹെയർ സ്‌പാ നല്ല പരിഹാരമാണ്. ഹോട്ട് ഓയിൽ മസാജ്, ആന്‍റി ഡാൻഡ്രഫ് ട്രീറ്റ്‌മെന്‍റ് ചെയ്യുന്നതും നല്ലതാണ്. ആരോഗ്യമുള്ള മുടി മുഖസൗന്ദര്യത്തിനു മാറ്റു കൂട്ടും.
• മുഖം, മുടി പോലെ തന്നെ പ്രധാനമാണ് കൈകാലുകളുടേയും പ്രത്യേകിച്ച് നഖങ്ങളുടേയും പരിചരണം. വിവാഹത്തിനു രണ്ട് മാസം മുമ്പ് തന്നെ പെഡിക്യൂർ, മാനിക്യൂർ ചെയ്യുക. കൈകാലുകളിലെ മൃതകോശങ്ങൾ നീക്കുന്നതിനു ഇത് സഹായകരമാണ്. ഇനി നഖങ്ങൾക്ക് ആകൃതി നൽകി ഭംഗി വരുത്തുക.
• ബോഡി പോളിഷിംഗ് ചർമ്മത്തിന്‍റെ പരുപരുപ്പു മാറ്റി മൃദുലമാക്കും. ശരീരത്തിന്‍റെ ക്ഷീണമകറ്റി ഫ്രഷ്‌നസ്സ് നൽകുന്നതിനു ബോഡി സ്‌പാ ഗുണകരമാണ്. ബോഡി മസാജ്, ഹെഡ് മസാജ്, ഫുട് മസാജ്, ഹോട്ട് മസാജ് എന്നിങ്ങനെ സ്‌പാ പലതരത്തിലുണ്ട്. എന്നിരുന്നാലും വധുവിന് ബ്രൈഡൽ സ്‌പാ ചെയ്യുന്നതാവും അനുയോജ്യം. വിവാഹത്തനു മൂന്നു മാസം മുമ്പ് തന്നെ സ്‌പാ ട്രീറ്റ്‌മെന്‍റ് തുടങ്ങുക.
• വിവാഹ ദിവസം ചർമ്മത്തിനു ചേരുന്ന വാട്ടർ പ്രൂഫ് മേക്കപ്പ് വേണം അപ്ലൈ ചെയ്യാൻ. ഫ്രഷ്‌നസ്സും സൗന്ദര്യവും നിലനിർത്തുന്നതിനു ഇതു സഹായിക്കും.

സ്‌ട്രെസ്സ്

• മനസ്സിൽ പോസിറ്റീവ് ചിന്തകൾക്കിടം നൽകാം, എപ്പോഴും ഹാപ്പിയായിരിക്കുക.
• കല്ല്യാണപ്പെണ്ണ് സ്വന്തം അഭിപ്രായം തുറന്നു പറയുക. വിവാഹ ഒരുക്കങ്ങളിൽ വീട്ടുകാരെ സഹായിക്കുക. ബന്ധുക്കളോടും സുഹൃത്തുക്കളോടും മനസ്സു തുറന്നു സംസാരിക്കുക.
• രാത്രി ഉറക്കമിളയ്‌ക്കരുത്. ഉറക്കമില്ലായ്‌മയും ടെൻഷനും സൗന്ദര്യത്തെ ബാധിക്കും. സ്‌ട്രെസ്സ് അകറ്റാൻ യോഗയും, വ്യായാമവും ശീലിക്കുക.
• ഡാർക്ക് ചോക്ലേറ്റ് ഭക്ഷണത്തിലുൾപ്പെടുത്തുക. ഇത് സ്‌ട്രെസ്സ് കൺട്രോൾ ചെയ്യാൻ ഏറെ സഹായകരമാണ്.

ഹെൽത്ത് – അറിഞ്ഞൊരുങ്ങാം…

• സ്‌ഥിരമായി കണ്ണട ധരിക്കാറുണ്ടോ? വിവാഹവേളയിൽ കണ്ണട ധരിക്കുന്നത് മേക്കപ്പിന്‍റെ മാറ്റു കുറയ്‌ക്കുമെന്നതിനാൽ ഈ അവസരത്തിൽ കണ്ണട ഒഴിവാക്കാം. ലേസർ സർജറി ചെയ്യുകയോ കണ്ണുകളിൽ കോണ്ടാക്‌ട് ലെൻസ് അണിയുകയോ ചെയ്യാം. ഡോക്‌ടറുടെ ഉപദേശമാരായാൻ മടിക്കണ്ട.
• സ്‌റ്റൈലിഷ്, ഫാഷനബിൾ പാദരക്ഷകൾ അണിയുന്നതിൽ തെറ്റില്ല. എന്നാൽ ഹീൽ ഉള്ള ചെരിപ്പുകൾ കഴിവതും ഒഴിവാക്കാം. നടുവേദനയ്‌ക്കും, കാലിൽ നീരുണ്ടാവുന്നതിനും ഇതിടവരുത്തും. ഈ അവസരത്തിൽ കംഫർട്ടബിൾ ചെരിപ്പ് അണിയുന്നതാവും ഉചിതം.
• വിവാഹത്തിനു ഒരാഴ്‌ച മാത്രം ബാക്കിയുള്ളപ്പോഴാവും പലരും മൂക്കു കുത്തുക. എന്നാൽ ഒരു മാസം മൂക്കു കുത്തുന്നതാണ് ഉചിതം. കാരണം പഴുപ്പോ നീരോ മറ്റു തരത്തിലുള്ള അസ്വസ്‌ഥതകൾ ഒഴിവാക്കാനാവും.
• ദന്ത ചികിത്സ നടത്തി കേടുപാടുള്ള പല്ലുകൾ ശരിയാക്കിടെുക്കുക.

വിവാഹ ദിവസം മനസ്സു തുറന്നു ചിരിക്കാമല്ലോ?

ഈ ഭുമിയിൽ വിടരുന്ന എല്ലാ പുഷ്പങ്ങളും ഭംഗി ഉള്ളതാണ്, ഓരോന്നിനും അവശ്യകരമായ നിറവും മണവും, വശ്യതയും പ്രകൃതി കനിഞ്ഞു നല്‍കിയിട്ടുമുണ്ട്. അതുപോലെതന്നെ സ്ത്രീകളും പൂക്കൾക്കു സമം. സൗന്ദര്യം ഇല്ല എന്നുപറഞ്ഞ് ഒരു സ്ത്രീയെയും മാറ്റി നിർത്താൻ ആവില്ല. ഒരു സ്ത്രീയുടെ ആകാരവടിവ് ആണ് അവളുടെ സൌന്ദര്യത്തിനു മാറ്റ് കൂട്ടുന്നത്. എന്നാൽ 2 മക്കൾക്ക്‌ ജന്മം നല്കുന്നതോടെ പല സ്ത്രീകളും സ്വയം അവഗണിക്കുന്നു. സൗന്ദര്യബോധങ്ങളില്‍ നിന്ന് അകന്നുമാറുന്നു. എന്താണിതിനു കാരണം? ഈ അവഗണയാണ് കാലക്രമേണ അവളുടെ സൌന്ദര്യം നശിപ്പിക്കുന്നതും അവളെ സമൂഹത്തിന്റെ പിന്നാമ്പുറങ്ങളിലേക്ക് തള്ളി മാറ്റുന്നതും.